Talisay wa pa’y 2016 budget

CEBU, Philippines - Gipahibawo ni Bise Mayor Romeo Villarante sa Dakbayan sa Talisay nga katapusan na nila’ng session sa tuig 2015 ang nahitabo niadto’ng Martes sa buntag.

Ila’ng gipasar ang supplemental budget number 5 nga gipangayo ni Mayor Johnny de los Reyes diin nalakip ang bonus sa mga kawani sa City Hall.

Matud ni Villarante nga pahuway una ang konseho samtang ila’ng pahimuslan ang Christmas break gawas lang kung mopatawag ang mayor o ba kaha ang konseho og special session tungod sa importante nga tukionon.

Apan gipasabot ni Villarante nga magsige ra unya gihapon sila og kita sa mga konsehal tungod kay ila pa tukion ang 2016 annual budget.

Gani niadto’ng Miyerkules gihimo ang Christmas Party sa mga sakop sa legislative department sa usa ka resort sa Dakbayan sa Lapu-Lapu.

Mobalik sa ila’ng naandan nga trabaho ang konseho unya na sa Enero 5, 2016. (BANAT NEWS)