Babaye’ng pusher, 2 lalaki sikop sa buy-bust

CEBU, Philippines - Nasikop sa kapolisan ang tulo ka gikatahapang pusher og shabu nga naglakip sa usa ka babaye sa Sitio Gulf, Looc, Dakbayan sa Danao ug nasakmit ang kapin sa P10 mil nga kantidad sa shabu ala una pasado sa niagi’ng kadlawon.

Si Police Officer 3 Roselo Campo sa Danao City Police Station niila sa tulo nga sila si Analyn Batoon, 53, Mark Glendon Bono, 20, ug Dominador Laguna Jr., hingkod nga nagpuyo sa mao’ng dapit.

Matud ni Campo nga si Batoon mao’y target sa ila’ng buy-bust operation human usab sa pipila ka adlaw nga pagpaniid nga ila’ng gihimo sa ilegal nga kalihukan sa mao’ng lugar.

Diha’ng gitunol sa poseur buyer ang P200 nga marked money bugti sa usa ka pakete’ng shabu, dali’ng gidakop ang suspek ug sa pagrekisa nakuha usab nila ang dugang walo ka pakete.

Sila si Bono ug Laguna nga didto usab sa mao’ng dapit atol sa operasyon ang lakip sa girekisa ug nakuha ang 12 pa ka pakete nga gihuptan hinungdan nga lakip sila sa gisikop.

Samtang ang team nila’ng Police Officer 3 Jomar Salomon sa Danao City Police Station nilampos usab sa pagpanglarot sa 40 ka dagku’ng punoan sa marijuana sa Sitio Awihaw, Santa Rosa sa mao’ng dakbayan apan nakadagan ang wala hiilhi’ng lalaki nga gikatahapan nga nagtanum niini. (BANAT NEWS)