Flyover nga ipatukod unta gibabagan
CEBU, Philippines – Si kanhi mayor Tomas R. Osmeña miingon nga si Mayor Michael Rama mao gyud ang angay’ng basulon sa mga motorista sa grabeng problema sa trapiko dinhi sa dakbayan, ilabi na diha sa Lahug.
Matud ni Osmeña nga kaniadto diha nga kongresista pa siya sa Cebu City South District, naninguha siya nga makakuha og kuwarta aron ikapatukod og flyover diha sa eskena Sudlon Road ug Gorordo Avenue, ingon man sa eskena Gorordo Avenue ug Salinas Drive.
Gipasabot ni Osmeña nga gipangitaan niya og sulbad ang problema sa trapiko sa Gorordo Avenue bisan og dili kini sakop sa south district.
Sa ingon nga paagi deretso na ang mga sakyanan nga moagi ug dili na mohunong sa pag-abot nila sa eskena, apan ang maong proyekto gibabagan ni Mayor Rama.
Gitataw ni Osmeña nga ang kuwarta nga iyang napagahin alang unta sa pagtukod og duha ka flyover project sa Lahug dili gikan sa iyang PDAF, kondili, hinangyoan gikan sa DPWH.
Napanglantawan ni Osmeña nga kun ang karsada nga nagdugtong sa Guadalupe paingon sa Lahug hingpit na nga agian sa mga sakyanan, makasinati og problema sa trapiko ang eskena Gorordo Avenue ug Sudlon.
Pagka karon, ang Cebu City Transportation Office (CCTO), igo lang nagbutang og puthaw nga railings taliwala sa Gorordo Avenue aron kadtong mga sakyanan nga gikan sa Sudlon dili makaliko paingon sa JY, ug kadtong gikan sa Lahug, dili makaliko paingon sa Sudlon. (BANAT NEWS)
- Latest
