Kawani sa DPWH napasok sa dump truck

CEBU, Philippines - Nakabsan sa kinabuhi sulod sa tambalanan ang 60-anyos nga trabahante sa Department of Public Works and Highways (DPWH) human nadasmagan sa usa ka dump truck sa Barangay Luy-a, Lungsod sa Medellin pasado alas 7 sa buntag sa nakalabay nga adlaw.

Ang biktima giila nga si Calixto Tudtud, minyo nga taga Barangay Polambato, Dakbayan sa Bogo ug nagtrabaho sa DPWH District Office sa Medellin.

Ang drayber sa dump truck mao si Danilo Jurcales, 59, taga Sitio Lacdon, Barangay Dayhagon, Medellin.

Matud ni Senior Police Officer 1 Ryan Castro sa Medellin Police Station nga samtang sakay sa motorsiklo si Tudtud gikan sa Bogo ug paingon sa trabahoan, aksidente kini’ng nakaligis og bato sa karsada hinungdan nga nawad-an sa balanse sa motorsiklo.

Tayming usab nga iya’ng nakatagbo ang dump truck nga gimaneho ni Jurcales ug didto kini napasok.

Nadala pa sa Cebu Provincial Hospital sa Bogo ang biktima apan gumikan sa seryoso’ng bun-og sa ulo ug ubang bahin sa lawas, gibalhin kini sa Vicente Sotto Memorial Medical Center (VSMMC) apan nakabsan gyud sa iya’ng kinabuhi samtang sakay sa ambulansiya sa Lungsod sa Sogod.

 Temporaryo nga gitanggong sa selda sa kapolisan ang drayber sa dump truck samtang nagpaabot nga pasakaan og kaso.

Sumala pa ni Castro nga nakabisita na sa ila’ng buhatan ang pamilya sa namatay apan wala pa kini pamahayag bahin sa kaso o kabahin sa panagsabot-sabot.

Karong adlawa gipaabot sa kapolisan nga mobalik sa ila’ng buhatan ang pamilya sa namatay ug kung wala’y kaso nga ipasaka sa drayber mapugos usab sila sa pagpagawas niini. (BANAT NEWS)