Drug den operator, 3 pushers sikop

CEBU, Philippines - Kapin sa P100,000 nga kantidad sa ilegal nga drugas ang nasakmit sa Lapu-Lapu City Police Office-City Intelligence Branch gikan sa duha ka lalaki sa gikataho’ng drug den sa Mahayahay, Barangay Marigondon sa niagi’ng alas 9:15 sa Miyerkules sa gabii.

Matud ni Police Chief Inspector Mark Gifter Sucalit sa LCPO-CIB nga una’ng gikadop pinaagi sa buy-bust operation si Jigger Aro, 28-anyos, taga Kalubihan, Barangay Pajac, kinsa nakuhaan og 12 ka gagmay’ng putos sa shabu ug laing tulo ka medium-size niini, P400 nga gituohang halin sa ilegal nga kalihukan ug usa ka .38 caliber pistol nga adunay lima ka bala.

Usa ka concerned citizen ang nisumbong sa kapolisan sa wala pa gihimo ang operasyon.

Usa ka buwan nga gipaubos sa surveillance si Aro kinsa giingong tiggamitan og shabu sulod na sa duha ka tuig.

Sunod nga gidakop sa kapolisan si Mauricio Jumao-as Jr. kinsa giingong nag-operate sa drug den sa mao’ng dapit.

Mga drug paraphernalia ug usa ka pack nga aluminum foil strip ang nasakmit gikan ni Jumao-as lakip na ang usa ka improvised shotgun ug ang upat ka rounds sa cartridge shell.

Ang duha ka suspek pulos natanggong sa LCPO-holding cell ug pasakaan og kaso sa kalapasan sa Comprehensive Dangerous Drugs Act of 2002 ug Illegal Possession of Firearms.

Samtang mokabat sa P25 mil nga kantidad sa shabu ang nasakmit sa mga sakop sa CIB sa Cebu City Police Office gikan sa usa ka 48-anyos nga lalaki atol sa buy-bust operation sa Barangay Sambag II pasado alas 10 sa nakalabay nga gabii.

Giila ang dinakpan nga si Wilson Abasolo Yu, minyo ug nagpuyo sa mao’ng dapit.

Matud ni Insp. Gomersendo Mandawe, deputy chief sa CIB, nga nahinabi sa Banat News nga aduna’y nakahatag nila og impormasyon kabahin sa ilegal nga kalihukan ni Yu hinungdan nga ila usab kini nga gipanid-an.

Niadto’ng nakalabay nga gabii natigayon ang pagsikop sa kapolisan sa dinakpan human nakapalit ang asset og usa ka pakete sa gituohang shabu.

Nasakmit gikan sa dinakpan ang 51 ka gagmay nga pakete sa gituohang shabu nga kantidad og P25, 000.

Si Mandawe niingon nga igo lang hagbungan og drugas ang suspek ug kini na usab ang mangbaligya sa mga kostumer nga nagpuyo ra sa mao’ng dapit.

Samtang sa lungsod sa Asturias, nasikop usab sa kapolisan ang usa ka 37-anyos nga lalaki nga nakuhaan og pinakete’ng shabu sa Barangay Sta Lucia pasado alas 3 sa nakalabay nga hapon.

Ang dinakpan naila nga si Sherwin Jayme, minyo nga nagpuyo sa mao’ng dapit.

Apan sa wala pa nasikop si Jayme nahitabo pa ang ginukuray human nikaratil og dagan ang suspek diha’ng nakamatikod nga adunay polis.

Nakuha sa kapolisan gikan sa suspek ang 14 ka gagmay nga pakete sa shabu nga kantidad og P11, 564.

Gipaslak na sa selda sa Asturias Police Station ang dinakpan nga gikatakdang pasakaan og tukma’ng kaso. (BANAT NEWS)