Cebu ikatulo sa cattle production

CEBU, Philippines – Nahimutang sa ikatulo’ng dapit ang Probinsiya sa Sugbo sa over-all cattle production sa nasud human naka-produced kini og 113,360 ka baka ug kabaw base sa ulahi’ng inventory sa Department of Agriculture. Si Provincial Veterinarian, Dr. Mary Rose Vincoy, nibutyag nga sa nilabay’ng mga tuig ang Sugbo nahimutang sa ikalima.

Kabahin sa production sa kanding, ang Probinsiya sa Sugbo mao’y top producing province sa nasud sulod na sa lima ka tuig.

Subay niini, 180 ka kabaw ug baka ang gipanghatag sa probinsiya ngadto sa 32 ka local government units (LGU) sa nilabay’ng buwan.

Ang Provincial Veterinary Office padayon sa ila’ng pagpanghatag og large animals hangtud sa sunod tuig.

Gawas sa large animals, lakip nga gipanghatag ang mga kanding.

Nikabat sa 150 ka kanding nga nagkantidad matag usa og P900 ang gikatakda’ng ipanghatag sa sunod tuig.

Ang goat dispersal program sa Kapitolyo nagsugod niadto’ng 2008 ug ang beneficiaries niini hatagan og tag usa ka kanding nga baye ug isip bayad, ang recipient mohatag og duha ka anak sa kanding ngadto sa Kapitolyo.

Samtang sa baka, ang recipient mouli sa inahan niini ngadto sa probinsiya samtang ang anak niini nga magpanuigon og unom ka buwan ibilin sa mag-uuma. Si Vincoy nagkanayon nga daku kaayo’ng tabang sa mga mag-uuma ang pagpanghatag sa probinsiya sa mga hayopan tungod kay makadugang usab kini sa ila’ng abot.

Si Gobernador Hilario Davide III sa iyang bahin nagkanayon nga buot niya’ng modaghan ang dairy farmers sa probinsiya.

Matud ni Davide nga buot niya nga ang mga lokal nga suppliers og gatas maka-meet sa demand sa mga Sugboanon.

Niadtong Marso, ang PVO nakapanghatag og 85 ka large animals sa 16 ka LGUs sa amihanan nga naapektuhan sa bagyo’ng Yolanda. (BANAT NEWS)