District hospitals monitoron sa facebook

CEBU, Philippines - Mogamit na sa social media ang Provincial Health Office (PHO) aron direkta sila’ng mahibawo ug makatubag sa reklamo sa katawhan.

Kini human nitumaw ang sunod-sunod nga kontrobersiya sa mga doktor sa mga district hospitals sa probinsiya ug ang uban pinaagi sa Facebook.

Si Dr. Cynthia Genosolango, pangulo sa PHO, nibutyag nga magtukod sila og Information and Documentation Team ug maghimo og account sa Facebook aron dali ma-access sa publiko ug matubag dayon nila ang reklamo.

Buot usab nila’ng mapahibawo sa katawhan ang ila’ng mga gihimo’ng kalihukan kabahin sa programa sa panglawas ug uban pa.

Matud ni Genosolango nga ang Facebook lang unya ang ila’ng unahon sa pagbukas tungod kay mao kini ang labi’ng dali ug kasagaran karon sa katawhan aduna na’y Facebook account.

Gibutyag ni Genosolango nga aduna sila’y personnel nga maglangkub sa team nga mga plantilyado sa Health Education and Promotion Office (HEPO).  (BANAT NEWS)