Gitulis, gidunggab dayon gilumsan

CEBU, Philippines – Patay ang usa ka babaye nga biktima sa pagpanulis human kini gidunggab ug gilumsan sa tubig sa lim-aw sa silingan niini nga usa diay ka tulisan diha sa Sitio Lamac, Barangay Yati, Lungsod sa Liloan.

Si Police Officer 3 Jayson Gayo sa Liloan Police Station miila sa biktima nga mao si Emmarie Ortega, 25, dalaga nagpuyo sa maong dapit samtang ang suspetsado nga nadakpan sa follow up operation mao si John Harvey Calan, 24, silingan sa maong dapit.

Matud pa ni Gayo nga padulong na pauli ang biktima dihang kalit kining gisugat sa suspetsado ug gitionan kini og kutsilyo dungan ang pagdeklarar og tulis alas 7 pasado ang takna sa gabii. Ang biktima nga nakalitan wala gilayon makahatag sa iyang shoulder bag hinungdan nga nahitabo gayod ang pagdinumogay sa duha.

Apan gilupig ang biktima ug nadunggaban sa lawas ug pagkahuman giguroy kini padung sa kasagbotan nga adunay lim-aw nga tubig ug didto gilumsan kini sa suspek nga nakaingon sa kamatayon niini.

Matud pa nga gidala dayon sa suspetsado ang shoulder bag sa biktima nga adunay sud nga P4 mil kapin nga salapi, cellphone,  relo de pulso ug uban pa.

Apan sa paggawas sa suspek gikan sa crime scene adunay nakakita kaniya nga si Ricardo Pepito (di ang kandidato sa Toledo) nga nagbitbit kini og shoulder sa usa ka babaye.

Sumala pa sa kapolisan, ang suspek misulti dayon kang Pepito nga adunay babayeng gitulis ug gipatay diha sa unahan hinungdan nga dali kining gisubay sa mga tawo ug nakompirmar kini maong mitawag sila og polis.

Sa pag-abot sa mga polis, ug sa pagsubay sa hitabo narekober ang bag sa biktima diha sa balay sa usa nila ka silingang babaye kinsa mitug-an sa mga polis nga gibilin sa suspek ug gitudloan kun asa kini magpuyo.

Ang suspek nadakpan dayon ug narekober gikan kaniya ang mga butang sa biktima lakip ang kutsilyong gigamit sa krimen. – /EIM) (BANAT NEWS)