Gi-Salvage sa Naga

CEBU, Philippines – Usa ka wala mailhing tawo nga gituohang biktima sa ‘summary execution’ ang napalgang patay luyo sa usa ka balay diha sa Barangay Lutac, siyudad sa Naga kagahapon sa buntag.

Si Gregorio Bonghanoy, 57, nagpuyo sa nahisgutang lugar mao ang nakakita sa biktima luyo sa iyang panimay nga wala nay sinina ug nagsul-ob lang og checkered nga purol nga adunay silver nga singsing sa tunga nga tudlo.

Sa  pagsusi sa kapulisan ilang nasuta nga aduna kini samad pinusilan sa iyang agtang ug narekober usab ang usa ka kabhang sa .45 nga bala.

Si Superintendent Jovito Canlapan, hepe sa kapulisan sa maong siyudad nitug-an nga walay bisan kinsa sa lugar ang nakaila sa biktima.

Nagduda sila nga gilabay ra ang biktima diha sa maong lugar human kini gipatay sa laing dapit.

 Si Canlapan nagkanayon nga posibleng adunay dakong atraso ang biktima sa mga tawong nipatay niini.

Sa laing bahin, gipusil patay sa wa pa mailhing tawo nga nanuktok sa iyang balay ang usa ka lolo pasado alas 4 kagahapon sa kaadlawon sa Sitio Tunga, Barangay Tubod-Bitoon sa Lungsod sa Dumanjug.

Wa nay kinabuhi si Jesus Paisano, 69, dihang naabtan sa iyang mga silingan human sila nakamata tungod sa usa ka buto sa armas sa sayong kaadlawon kagahapon.

Sumala pa ni Police Officer 1 Lorenel Labasa, desk officer sa Dumanjug Police Station may samad pinusilan sa iyang lawas ang biktima.

Nasuta sa imbestigasyon sa kapolisan base sa pamahayag sa mga saksi nga may wala mailhing lalaki ang nanuktok sa alas- 4 sa kaadlawon sa balay sa biktima.

Sa pag-abli niini sa maong tawo kalit lang siyang gipusil sa walang bahin sa iyang tiyan hinungdan sa iyang kamatayon.

Gisubay pa sa kapolisan kun unsay motibo sa pagpamusil patay sa maong tiguwang. (BANAT NEWS)