Task Force Butane canisters gimugna na

CEBU, Philippines - Ang Bureau of Fire Protection (BFP) magmugna na og task force aron mogukod sa mga ilegal nga refillers og LPG nga isulod sa mga basiyo nga butane canisters.

Mao kini ang gibutyag ni FO3 Wendell Villanueva, ang nagsilbi nga tigpamaba sa BFP-7 regional office, tungod kay naalarma na sila sa giingong mga sunog nga naggumikan sa refilled butane canister.

Si Villanueva miingon nga gitigom nila ang mga “statistics” sa mga sunog nga nahitabo sa lainlaing dapit sa rehiyon nga ang hinungdan mao ang paggamit og refilled butane canister.

Gitataw hinuon ni Villanueva nga kadtong sunog nga nakaugdaw og mga 50 ka balay sa Sitio Puntod ug Sitio Abbya sa Mambaling sayo ning semana dili refilled butane canisters ang nakaingon.

Ang Department of Energy (DOE) gikataho nga nangayo na og tabang sa kapolisan aron magukod nila ang mga tawo nga nag-refill og mga butane canisters nga anaa ra gihimo sa palibot sa ilang kabalayan.

Si Douglas Labra, presidente sa kahugpongan sa mga LPG Budget canister refillers dinhi sa Sugbo, mihangop kun ang kampanyahan sa DOE ug ubang ahensiya sa kagamhanan mao kadtong mga backyard refillers.

Matud ni Labra nga ang ilang mga sakop sa grupo may mga himan gayud sa pag-refill ingon man gihatagan sila og mga permiso sa mao nga negosyo.

Gipasabot ni Labra nga mga bag-o gyud nga lata sa butane ang ilang gipanggamit nga pinalit nila gikan sa pabrika ug dili sama sa mga gigamit sa backyard refillers nga apil sa mga gipangsudlan mao ang mga tayaon nga lata. (Rene U. Borromeo)(BANAT NEWS)