10 nadakpan tungod sa drugas

CEBU, Philippines - Nasikop sa kapolisan ang usa ka suspetsadong drug pusher ug laing  upat ka lalaki sa buy-bust operation pasado alas-9 sa miaging gabii sa Sitio Tiber, Poblacion Ward 1 sa lungsod sa Minglanilla.

Gidala si Ian Jimenez, 29, suspetsadong drug pusher, human nga napalitan siya og P200 nga shabu sa mga sakop sa Regional Anti-Illegal Drugs Special Operations Task Group 7.

Gidala ‘sab sila si Elmer Baptismo, 32; Jose Borda, 37; Jerome Largo, 37; Louie Janes, 40, nga naatlan sa kapolisan sa maong drug den.

Matud pa ni Senior Inspector Mark Henrix Bancoleta sa RAIDSOTG7 nga nakadawat sila og taho naghitak ang drugas sa maong lugar ug adunay duha ka payag nga gihimong drug den si Jimenez.

Nakuhaan si Jimenez og unom ka medium packs ug 18 ka small packs sa gituohang shabu, samtang si Largo nakuhaan og kalibre .45 nga pistol samtang tulo ka pakete kang Janes, upat kang Borda ug lima kang Baptismo.  Apan ang mga dinakpan nanghimakak nga nalambigit sila sa drugas ug matud pa naatlan lang sila didto ug gidakop.

Nadakpan usab sa  buy-bust operation ang duha ka babaye ug usa ka lalaki sa Barangay  Casuntingan, Dakbayan sa Mandaue.

Si Police Officer 2 Jay-R Gulani sa Presinto 5 sa Mandaue City Police Office (MCPO) miila sa gikatahapang pusher nga babaye nga si  Marife Ermac, 38 anyos ug ang duha ka mga kauban mao sila si Raymond Ermac, 36, ug Negil Velasquez, 38. Nasakmit gikan kanila ang napulo ka gagmay nga paketeng shabu, marked money nga P200 ug mga drug paraphernalia. Laing nasakmitan og shabu ug nadakpan mao si Somala Maru Hombzars, 44,  nagpuyo sa dalan Duterte, Barangay Suba, Dakbayan sa Danao.

Si Police Officer 3 Arnold Labine nitug-an nga ilang naaktohan ang suspek nga namaligya og shabu sa usa ka wala mailhing lalaki ug sa ilang pagduol naglumba ang duha og panagan apan nadakpan ang suspek.

Samtang usa ka lalaki nga gidudahang nananom og marijuana ang nadakpan sa plantasyon niini diha sa Sitio Tipolo, Barangay Sanlagan, Badian.

Kapin sa 198 ka punoan sa marijuana ang gipang-ibot sa kapolisan  ug naposasan si Oscar Español, 40, nga gikatahong naaktohang nagtikad niini. Nakuhaan usab kini og armas nga .357 revolver nga adunay duha ka bala diha sa iyang hawakan (Jojo Ugdol, Bryner Diaz ug Romeo T. Limpangog ug report ni Lorjerist G. Llanto, USJR Intern/EIM)(BANAT NEWS)