CEBU maoy kinadatoan —COA
CEBU, Philippines - Ang probinsiya sa Sugbo maoy labing adunahan nga probinsiya sa tibuok nasud kini base sa 2014 nga annual financial report sa Commission on Audit (COA).
Ang Cebu Province adunay P28.181 bilyones nga equity, P29.69 bilyones nga assets ug P1.5 bilyones nga liabilities o utang. Ang probinsiya duna usab kini nahipos nga P651 milyones sa 2014 diin ang generating income niini P2.76 bilyones ug ang nagasto P2.11 bilyones.
Si Gobernador Hilario Davide, III nagpasalamat sa mga Sugboanon ug sa iyang kaubanan sa Kapitolyo sa nahisgutang achievement sa probinsiya.
Matud niya nga ang maong achievement nagpakita lang sa financial soundness sa probinsiya tungod sa pagtinabangay lakip sa mga pribadong sektor.
Samtang ang Dakbayan sa Sugbo nalakip sa top 10 list nga labing adunahan nga siyudad sa nasud kay ikaunom kini pinaagi sa equity nga P7.855 bilyones. Sayo pa, ang dakbayan sa Sugbo ug probinsiya giila isip third most competitive highly-urbanized city ug probinsiya sa National Competitiveness Council.
Base sa COA financial report ang mga probinsiya nga nagsunod sa Cebu Province gilangkuban sa Rizal sa Region 4 nga dunay P6.71 bilyones nga equity, Cavite sa Region 4-A nga dunay P4.91 bilyones nga equity, Negros Occidental sa Region 6 nga dunay P4.7 bilyones nga equity ug Laguna sa Region 4 nga dunay P4.74 bilyones nga equity.
Ang ubang probinsiya nga nalakip sa top 10 list gilangkuban sa Batangas; Pangasinan ; Negros Oriental ; Isabela ug Pampanga.
Sa city level, nag-una ang Makati City; misunod ang Quezon City ; Pasig City; Manila City; Zamboanga City;Cebu City; Caloocan City; ug Cagayan de Oro City. (Brenda D. Batuto/EIM)(BANAT NEWS)
- Latest
