Pagpamaligya’g pabuto sa Mandaue gidili

CEBU, Philippines - Walay tugotan nga makapamaligya og pabuto sa dakbayan sa Mandaue bisan pa og nagkaduol na ang pagsaulog sa Pasko ug Bag-ong Tuig aron sa paglikay sa mga aksidente.

Si Senior Fire Officer 4 Roy Garcia nga maoy chief investigator sa Bureau of Fire Protection (BFP) sa Mandaue miingon nga ang ilang buhatan modili g’yud sa pagpamaligya og pabuto.

Matud ni SFO4 Garcia nga tungod kay wala may gitugotan nga makapamaligya og pabuto dili usab sila motudlo og firecracker zone area.

Ang higpit nga pagdili sa pagbaligya og pabuto sa Mandaue gitumong aron nga malikayan ang mga sunog.

Si Garcia miingon nga sugod sa unang semana sa Desiyembre, ang kabomberohan molibot sa kabarangayan aron manghatag og kasayuran sa mga lumolupyo labot sa kadaut nga masinati sa paggamit sa pabuto.

Samtang si Superintendent Julian Entoma nga maoy deputy director  for administration sa Mandaue City Police Office (MCPO) miingon nga sila sa kapolisan mosakmit sa mga pabuto nga ibaligya sa Mandaue. Miawhag si Entoma og suporta sa publiko kay ang pagpangsakmit mahimo lang kun ilang mahibaw-an ang mga dapit nga gihimo ang pagpamaligya og paboto.

Ang Republic Act 7183 kon Firecrackers Law naglatid nga kadtong gusto nga mamaligya og pabuto kinahanglan nga mokuha og permiso gikan sa Local Government Units ug sa kapolisan.

Ang mga mamaligya kinahanglan nga adunay pundohanan sa ilang pabuto nga layo ra sa kabalayan.  (BANAT NEWS)