Gipusil patay atubangan sa anak

CEBU, Philippines – Patay ang usa ka amahan human gipusil sa wala ilhing mamumuno atubangan sa iyang anak diha sa Sitio Kamagayan,  Barangay Bato sa dakbayan sa Toledo niadtong Lunes.

Giila ang gipusil patay mao si Joel Edoloverio kinsa gikatahong adunay gipalit sa usa ka tindahan kuyog sa iyang anak nga 9-anyos.

Matud pa ang duha ka mga mamumuno luwan og usa ka motorsiklo ug pulos nagsuot og helmet ug jacket.

Ang angkas nikanaog sa motorsiklo  ug diretsong mipusil sa biktima gamit ang kalibre .45 nga pistola sa makadaghang higayon lakip sa iyang nawong ug sa lawas.

Gidala sa Toledo City Hospital ang biktima apan patay na kining nadangat sa maong tambalanan.  Narekober sa crime scene ang unom ka kabhang sa bala ug duha ka slug sa kalibre .45 nga armas.

Daling misibat palayo sa lugar ang duha ka wala ilhing suspek. Samtang ang anak sa biktima nga nakasaksi sa krimen na-shock sa maong hitabo.

Padayon pang giimbestigahan sa kapulisan ang maong pagpamusil alang sa pagtino sa motibo sa krimen. – /EIM) (BANAT NEWS)