Sikyu sunggo, gisumbag sa kawatan

CEBU, Philippines – Nagsunggo ang guwardiya sa usa   ka mall sa Dakbayan sa Talisay human gisumbag sa kawatan nga iya unta’ng dakpon kagahapon sa kadlawon.

Apan ang kawatan nga si Anthony Gomez, 23-anyos, ulitawo nga taga Basak, Siyudad sa Sugbo, ang nasikop sa laing guwardiya pinaagi sa tabang sa mga standby.

Sa inisyal nga imbestigasyon sa kapolisan nasuta nga ang suspek nakit-an sa guwardiya sa Seaview Heights Subdivision sa Lawaan I nga si Faustino Patoc nga nagbitbit og amplifier.

Si Patoc ang nagduda nga kinawat kini sa suspek hinungdan nga iya’ng gisundan.

Nakabantay ang suspek sa presensiya ni Patoc ug gibilin ang amplifier ug nidagan paingon sa Starmall.

Gigukod ni Patoc ang suspek dayong singgit ug tabang sa guwardiya sa mall nga si Carlito Timtim.

Si Timtim ang nibabag sa suspek apan wala kabantay nga ni-labay og kinumo ang suspek ug maayo’ng pagkaigo sa ilong hinungdan sa pagsunggo.

Nisuway pa pagsibat ang suspek apan nasikop tungod kay niapil na sa paggukod ang mga standby sa lugar.

Naputos sa bun-og sa iya’ng lawas ang suspek gumikan sa kulata.

Nahibaw-an nga gipanag-iya ang amplifier ni Joey Bill Tanato, 37-anyos, minyo nga residente sa mao’ng subdivision.

Gikatakdang pasakaan og kaso’ng pagpangawat ang suspetsado. – /GMR) (BANAT NEWS)