Kapin P1m shabu, armas nasakmit

CEBU, Philippines - Kapin sa usa ka milyon ka pesos nga kantidad sa gituohang shabu ang nasakmit sa kapolisan sa Probinsya sa Sugbo atol sa managlahi’ng operasyon kagahapon sa buntag ug sa nakalabay nga adlaw.

Sa Dakbayan sa Toledo, diriyot mapornada ang drug raid operation sa mga sakop sa Provincial Intelligence Branch sa Cebu Provincial Police Office sa Barangay Tapon pasado alas 11 sa nakalabay nga gabii human adunay nagpahibalo pinaagi sa text sa cellphone sa mga suspek sa pagpadulong sa kapolisan.

Nadakpan ang targert nga si Marlon Cantiga apan nakasibat ang inahan nga si Lucia nga nalambigit usab sa ilegal nga kalihukan.

Matud ni Senior Police Officer 1 Renante Solante nga human sa ila’ng pipila ka adlaw nga pagpaniid, ila’ng natultolan ang gipuy-an sa mga suspek hinungdan nga nihimo dayon sila og buy-bust operation.

Diha’ng nihamag na ang mga awtoridad nakabantay ang mga suspek hinungdan nga nakasibat ang inahan.

Sa cellphone ni Marlon nakit-an ang text message nga, “magbantay kay naa’y taga province.”

Nagduda si Solante nga posible’ng ang ila’ng mga kanhi nadakpan ang nakahatag og impormasyon sa suspek nga aduna sila’y operasyon apan wala usab gipadaplin ni Solante nga ila’ng kauban o usa ra usab ka polis ang nag-text.

Sumala pa ni Solante nga ila’ng paningkamutan nga masakpan ug mahibaw-an kung aduna ba’y traydor sa grupo kay sa matag operasyon nga mahibalo ang ila’ng target, mabutang usab sa peligro ang ila’ng kinabuhi.

Nasakmit sa kapolisan ang P280, 000 nga kantidad sa shabu gikan ni Marlon nga kasamtangan karong gitanggong sa selda sa Consolacion Police Station.

Target nakasibat

Samtang pasado alas 3 sa nakalabay nga hapon, ang mga sakop sa DAS Toledo Police Station ang nisakmit usab sa kapin tunga sa milyon ka pesos nga kantidad sa shabu sa ila’ng operasyon sa Purok 5 Carmen.

Nakasibat ang target nga si Kadafi Puyong apan nasikop si Bobby Arili, 30, giingong sinaligan ni Puyong.

Human nakatunol og usa ka pakete sa gituohang shabu si Puyong, nakabantay kini nga polis ang iya’ng kaatubang hinungdan nga nisutoy og dagan.

Atol sa ginukuray nakit-an sa mga polis nga gilabay ni Puyong ang usa ka brown nga pouch nga dunay upat ka dagku’ng putos sa shabu nga nikantidad og P550,000.

Si Arili ang apil nga gidakop sa mga polis human nakuhaan og usa ka pakete sa gituohang shabu.

Armado

Samtang ang mga sakop sa Criminal Investigation and Detection Group-7 ang nisikop sa tulo ka tawo nga naglakip sa duha ka magsuon sa La Paz, Poblacion, Dalaguete kagahapon sa alas 9 sa buntag.

Target sa CIDG-7 mao si Melver Jumamil nga usa ka notado’ng tigpahuyot og shabu sa mao’ng dapit apan kini nakasibat.

Hinuon nadakpan ang duha niya ka igsuon nga sila si Jonathan Jumamil ug Melvin Jumamil ug apil sa nasikop ang kapuyo ni Melver nga si Elena Espinosa.

Sumala pa ni Senior Insp. Delfin Bontuyan sa CIDG-7 nga lisud nga sudlon ang gipuy-an sa mga suspek sa sudlonon nga bahin nga duol ra usab sa buhatan sa kapolisan sa Dalaguete.

Dugay na nga gipanid-an sa mga polis ang magsuon apan kini idlas ug magsige lang og balhin-balhin.

Kagahapon sa buntag human sa buy-bust operation, dali sab nihamag ang mga polis apan nakabantay ang mga suspek ug nahitabo ang ginukdanay hangtud nga nakasibat si Melver.

Sulod sa balay nasakmit sa mga polis ang daghang shabu nga nikantidad og P236, 000.

Gawas sa shabu, usa ka KG9 sub-machine pistol nga dunay 19 ka bala ug usa ka 357 revolver nga may unom ka bala ang narekober gikan ni Jonathan.

Si Bontuyan niingon nga armado ang mao’ng pamilya ug mosukol gyud daw sa mga polis.

Gitanggong na sa selda sa CIDG-7 ang tulo ka suspek.

Nanuyop

Samtang panday ug drayber sa traysikol ang nasikop sa mga awtoridad human nanuyop ug nakuhaan og ilegal nga drugas sa Magay, Barangay Tanke, Dakbayan sa Talisay niadto’ng Sabado sa hapon.

Ang mga dinakpan mao sila si Jesmar Gaviola, 33-anyos, usa ka panday nga nagpuyo sa nahisgutang lugar ug Samuel Abatayo, 28-anyos, ulitawo, usa ka drayber sa traysikol        nga taga Barangay Lagtang.

Sila si Insp. Windell Abellana ug kaubanan ang nihimo og preventive patrol sa nahisgutang lugar diha’ng ila’ng naabtan ang duha nga nanuyop og ginadili’ng drugas.

Diha’ng girekisa, si Gaviola ang nakuhaan og tulo ka gagmay nga pakete sa shabu samtang duha ka pakete ang nakuha gikan ni Abatayo. - /GMR (BANAT NEWS)