France manimawos—Hollande

CEBU, Philippines - Mibahad si French President Francois Hollande ang mopahamtang og walay kukaluoy nga bawos ang France batok sa Islamic State terror group nga miangkong sila maoy responsable sa pagpangatake sa Paris niadtong Biyernes nga nikalas og 129 ka kinabuhi ug 352 ang nangaangol ug 99 niini ang kritikal, sumala pa sa report sa Associated Press.

Ang mga imbestigador aduna nay gisundang mga kakunsabo dili lang sa France kondili hasta sa Belgium ug Syria.

Agi og pagbangotan, gipawong ang tanang sugang dagitabnon sa sikat nga Eiffel Tower didto sa Paris isip simbolo sa gibating kagul-anan sa ilang nasud.

Sa Bataclan concert hall pa lang, 89 na ka mga tawo ang nakalas diin ang mga nangatake nadunggan nga nilitok og Syria ug Iraq sa wala pa nila paulboha ang ilang mga explosives vest kauban sa ilang mga hostage nga ang uban nangaangol na gikan sa pasiuna nilang pagpangrakrak.

Niadtong Sabado sa gabii, gibanabanang 250 ka mga tawo ang nihimo og impromptu candlelight vigil sa Place de la Republique.

Si Hollande mihulagway sa maong pangatake nga "an act of war that was prepared, organized, planned from abroad with internal help."

Tungod niini, gipahibalo ni Hollande nga dugangan pa sa France ang military operations batok sa IS dili lang sa Iraq ug Syria kondili hasta sa mga Islamic militants didto sa Africa.

Mga kadagkuan sa Simbahan ug usa ka lider sa Muslim  community dinhi sa Sugbo nasubo sa nahitabong pagpangatake sa mga terorista didto sa Paris, France nga nikalas og 129 ka mga kinabuhi sa mga inosenteng sibilyan nga kasagaran mga kabataan niadtong Biyernes sa gabii.

Si Archbishop Jose Palma sa Archdiocese of Cebu nanawagan sa mga Sugbuanon atol sa iyang Santos nga Misa kagahapon sa buntag sa Nuestra Señora Birhen dela Regla, sa Dakbayan sa Lapu-Lapu nga i -ampo ang mga biktima sa pagpangatake sa Paris.

Ang Imam ug administrator sa Mosque sa Basak San Nicolas nga si Dr. Aladdin Ubpon, nipadangat sa iyang kasubo sa maong dugoon nga pagpangatake.

Nanghinaut si Ubpon  nga mahunong ang maong kagubot ug nanawagan sa katawhan  nga ilakip usab pag-ampo ang mga terorista nga magbag-o ug mohunong na ang ilang dautang mga binuhatan.  – Gikan sa AP ug report ni Rowena D. Capistrano/EIM (BANAT NEWS)