Trak giambus drayber patay
CEBU, Philippines - Drayber sa 10-wheeler truck gipusil patay sa mga lalaking nagsakay og motor dihang nimenor kini og dagan sa may S. Osmeña Boulevard sa dakbayan sa Sugbo sa miaging gabii.
Wa na g’yud matabang sa mga sakop sa Emergency Rescue Unit Foundation (ERUF) si Edgardo Cadayday Jr., taga Santa Catalina, Negros Oriental, human siya natusak sa bala.
Base sa imbestigasyon sa Homicide Section sa Cebu City Police Office nga ang biktima nagmaneho sa trak padung sa Dakbayan sa Naga aron maghatod sa mga sako sa soy beans.
Apan base sa nakakita sa hitabo, adunay duha ka lalaking nagsakay og motor ug pulos nag-helmet ang nagpaabot sa eskina may S. Osmeña ug Sotto Street sa Barangay Tinago.
Dihang mihunong sa maong lugar kalit lang girakrakan sa lalaking nag-angkas sa motor ang biktima. Human sa hitabo, daling miikyas ang mga mamumuno sa wala matinong direksyon.
Ang biktima naigo sa ibabaw nga bahin sa iyang lawas lakip na sa iyang dughan. Ang mga sakop sa Crime Scene Investigation Unit naka-recover lima ka kabhang ug usa ka slug sa kalibre .9mm sa crime scene
Gisusi pa sa kapolisan kung unsay motibo sa maong krimen. (Bryner L. Diaz ug Decemay Padilla/EIM)(BANAT NEWS)
- Latest
