‘Konsehal’ nangutang og bugas gidakop
CEBU, Philippines – Imbis makabugas, nagtingkagol na hinuon sa selda sa kapolisan sa Lungsod sa Pinamungajan ang 43-anyos nga lalaki human nagpatuo nga usa ka konsehal sa barangay.
Ang suspek nga si Jonathan Bacus, minyo nga taga Calajoan, Minglanilla, ang suway unta nga nidala sa unom ka sako’ng bugas humay gikan sa usa ka negosyante sa merkado sa lungsod pasado alas 12 sa nakalabay nga udto.
Gipili pa ang maayo’ng klase nga bugas sama sa duha ka sako sa Ganador ug upat ka sako sa Lion Ivory. Si Bacus nagpaila nga konsehal sa Mangoto, Pinamungajan ug gusto mopalit og upat ka sako’ng bugas kang Presentacion Manlangit, 63, taga Opaw sa mao’ng lungsod. Ang bayad giingong adto na sa barangay hall hinungdan nga gikarga sa traysikol ang bugas kauban ang sales boy samtang si Bacus ang nagsunod nga nagsakay og taxi.
Apan sa wala pa nakaabot sa gisabutan nga barangay hall, gipahunong ni Bacus ang traysikol ug gimanduan ang sales boy nga ibalhin ang bugas sa taxi ug pabalikon ang sales boy sa tindahan kay mag-order pa kini og laing usa ka sako.
Nibalik ang sales boy nga nagkuha og dugang usa ka sako nga bugas apan sa ila’ng pagbalik nahanaw na ang taxi hinungdan nga nidangop sa kapolisan ang mga biktima ug gipahibawo ang mga silingan nga police station.
Sa San Fernando nadakpan ang suspek ug ang drayber sa Christoff Taxi nga may plate number GXE 491 nga si Jose Jecky Patiluna, 39, taga Lawaan, Dumanjug, kinsa nanghunaw sa kalambigitan sanglit igo lang siya nagmaneho.
Apan matud ni Police Officer 1 Ian Patrick Carvellida, desk officer sa Pinamungajan Police, nga nahinabi sa Banat News nga lisud tuohan ang pamahayag sa drayber kay dugay kaayo sila nga nagkuyog sa suspek gikan sa Dakbayan sa Sugbo.
Kaso’ng estafa ang ipasaka sa kapolisan batok sa duha. – /GMR) (BANAT NEWS)
- Latest
