Gikulata sa mga polis

CEBU, Philippines – Human nag viral sa social media sa Facebook ang hulagway sa usa ka lalaki nga naputos og bun-og ang nawong tungod sa matud pa pagpangulata, duha ka polis ang girelibohan sa ilang pwesto.

Ang pagpangulata nahitabo niadtong Nobiyembre 1 ning tuiga diha sud mismo sa Daanbantayan Police Station ug ang gipasanginlan mao sila si PO3 Raymond Pepito ug PO3 Alex Recarte.

Gustong paimbestigaran sa direktor sa Cebu Provincial Police Office, Sr. Supt. Noel Gillamac  ang duha  tungod sa maong hitabo.

Ang anak nga babaye sa biktimang si Romeo Toring, 56, nga taga Barangay Bitoon ang nag-post sa dagway sa iyang amahan diha sa Facebook human kini giingong gikulata sa duha ka polis.

Si Toring kinsa hubog niadtong tungora gikatahong nangayo og pagtugot sa hepe sa Daanbantayan Police Station nga si Senior Inspector Roger Quijano nga didto matulog sa presinto kay kini nakainom ug mahadlok mouli sa ilang balay kay basin kulatahon sa mga bugoy.

Apan dihang naabot sa police station ang duha ka mga polis nga gikan nagbantay sa sementeryo nahibulong nganong anaay natulog sa ilang buhatan maong ilaha kining gipukaw ug gibadlong.

Si Toring miesplikar sa duha nga nananghid na siya sa hepe nga didto kini matulog apan pugsanon kining gipagawas sa duha ka mga polis. Gumikan sa iyang paglugnot gikulata kini sa mga polis nga miresulta sa pagkasamad sa iyang ngabil ug nahubag ang iyang nawong. Ang anak niini wala makaagwanta sa gibuhat sa maong mga polis ngadto sa iyang amahan, gi-post niya kini sa Facebook hangtud nga nag-viral.Paglabay sa lima ka adlaw gikan pag-post, naabot ang impormasyon ngadto sa mga opisyal sa CPPO.

Ang duha gipaimbestigar karon sa Provincial Investigation and Detective Management Branch (PIDMB) samtang sila gidestino sa CPPO. Kasong grave misconduct ug abuse of authority ang atubangon sa duruha ka polis  wala pa’y labot sa kasong kriminal nga physical injury. – /EIM) (BANAT NEWS)