Masuso nabawi na

CEBU, Philippines – Nabawi na sa inahan ang tulo pa ka buwang masuso nga gikawat gikan kaniya sukad pa niadtong Nobiyembre 2 ning tuiga sa usa ka babaye samtang siya na-busy pagpamaligya og sigarilyo diha sa Cebu South Bus Terminal.

Ang masuso nabawi sa mga sakop sa Criminal Investigation and Detection Group-7 pinangulohan ni Senior Inspector Delfin Bontuyan gikan kang Mary Jean Carizon , 23, taga Sitio Canyupot, Calatagan, Dalaguete.

Ang suspek nadakpan diha sa usa ka compound sa Tayud, Liloan diin nahimutang ang balay nga ilang gipuy-an sa iyang kapuyo nga usa ka truck boy.

Matud pa ni Bontuyan, nasubay nila ang gikahimutangan sa suspek pinaagi sa narekober nga resibo sud sa bag nga iyang gibilin ngadto sa inahan sa masuso nga si Maricel Enriquez atol sa pagkahitabo.

Ang resibo gikan sa usa ka money transfer nga didto nagbase sa lungsod sa Samboan ug sa pagsusi didto nakakuha og litrato ang CIDG sa nilukat sa maong kwarta nga nitakdo sa dagway sa babayeng nikuha sa bata nga nakuhaan usab sa CCTV camera sa CSBT.

Naswertihan usab ang CIDG-7 tungod kay adunay mga polis sa maong lungsod ang nakaila sa kapuyo sa babaye ug nasubay nila nga didto na kini nagpuyo sa Liloan. Didto sa Tayud diin namalhin og puyo ang suspek ug ang iyang kapuyo, gipanid-an ang mga lihok ni Carizon hangtud nga nakompirmar nila nga aduna kini masuso nga gibuhi. Matud pa dihang gipangutana kini nganong iyang gikuha ang bata, nagdumili kini sa pag-angkon ug nagmagahi paghatag sa bata hinungdan nga giputol ni Bontuyan ang duyan ug diretso nilang giposasan si Carizon.

Dihang gipangutana kini sa mga polis nganong iyang gikuha ang bata, si Carizon mitubag nga naluoy  siya sa bata ug gusto niya kining buhion ug padak-on ug pagkahuman iyang “ibaligya aron ipatambal sa akong anak.” Gisubay pa karon sa kapolisan ang pangangkon sa babaye nga bag-ohay lang kining nanganak.

Nasuta usab nga bisan ang iyang kapuyo nasagmuyo tungod kay gipatuo siya niini nga ang maong bata mao ilang anak, apan diay gibilin niini didto sa Dalaguete kay nasakit. Matud pa ni Bontuyan, kasong kidnapping ang ilang ipasaka batok kang Carizon.

Si Enriquez maayong pagkagakos ug nakahilak pagkakita pag-usab sa iyang anak ug dako iyang pasalamat sa CIDG-7 nga nitabang kanila. Matud pa niya, naleksyon na siya sa maong hitabo.  –/EIM) (BANAT NEWS)