Amerkano nakuhaan og armas sa MCIA
CEBU, Philippines - Usa ka langyaw na usab ang nadakpan diha sa Mactan-Cebu International Aiport (MCIA) ug ning tungora usa ka Amerikano nga nagdala og armas niadtong Domingo sa gabii samtang kini padung mosakay og abyon padung sa South Korea.
Ang gidakop sa mga sakop sa Aviation Security Group-7 mao si Timothy Lee Lindsey, 66, kinsa padulong sa Incheon, South Korea mosakay unta sa Korean Air sa dihang nakita sa x-ray machine ang usa ka kalibre 45 pistola nga adunay duha ka magazines ug duha ka bala. Ang armas gisulod sa usa ka tool box nga gisud usab og mga karton apan nasakpan kini sa initial security screening sa international departure area sa mga sakop sa Office of Transportation Security(OTS). Si Lindsey nga taga California, USA nangangkon nga usa siya ka kapitan sa usa ka tugboat.
Apan matud ni Senior Superintendent Joselito Salido sa ASG-7, gawas sa maong impormasyon wa nay gihatag nga detalye ang langyaw bahin sa pagdala niini og armas. Apan si Salido nagtuo nga base sa pamahayag ni Lindsey nagtuo ang langyaw nga “exempted” siya pagdala og armas tungod sa posisyon niini nga kapitan sa tugboat.
Walay napakitang legal nga dokumento sa armas ang langyaw.
Apan niangkon ang langyaw nga iyaha lamang kining napalit og P7 mil gikan sa usa ka sibilyan.
Si Lindsey makatulo na ka higayon nakaanhi sa Cebu tungod kay taga Ormoc City ang uyab niini.
Kasong paglapas sa Republic Act 10591 o Illegal Possession of Firearms and Ammunition ang gipasaka kang Lindsey ug gipaubos dayon og inquest proceedings sa Lapu-Lapu City Hall of Justice kagahapon sa buntag.
Niadtong nakalabay nga semana, usa usab ka Taiwanese ang nadakpan sa MCIA tungod gihapon sa suway nga pagpalusot og armas diha sa ilang bagahe. (Christell Fatima ug Rowena D. Capistrano/EIM)(BANAT NEWS)
- Latest
