Apura, Alcoseba nagsinawayay na

CEBU, Philippines - Nagsinukliay og mga pagsaway ang managribal nga sila si Carcar City Mayor Necipuro Apura ug Bokal Raul Alcoseba human sa kalihukan sa Liberal Party nga gitambungan sa kandidato sa pagka-bise presidente nga si Kongresista Leni Robredo sa Camarines Sur.

Kini human si Apura kinsa sakop sa Alayon Party namahayag nga wala pa siya ka desisyon kung kinsa ang iya’ng suportahan sa pagka-bise presidente.

"Pagka wa gyu’y buot. Mao nana ako’ng giingon ninyo nga magkabang-kabang mo, kung gusto mag-LP unya gusto magpa-isa o pa endorse dayun sa governor. Unya to naa’y candidate sa LP moingon dayun nga wala pa makadesider. Tarung ba gud na?" asoy ni Alcoseba.

Si Apura sa iya’ng bahin nagkanayon nga si Alcoseba ang wala usab sa pamatasan human wala nitunga sa kalihukan sa LP.

Matud niya nga dili angay magbuot si Alcoseba kung kinsa ang ila’ng paluyuhan nga bise presidente sanglit wala pa man nakadesisyon ang ila’ng partido. Iya sab gipasabot nga sila ang gi-imbitar ni Gobernador Hilario Davide III, provincial chairman sa LP sa Sugbo, ug wala namugos nga motambong sa kalihukan.

Matud ni Alcoseba nga sila’ng orihinal nga sakop sa LP ang gi-imbitar sa kalihukan apan siya wala nakatunga tungod kay aduna siya’y nag-una nga appointment.

Laing sakop sa Alayon nga si Mayor Valdemar Chiong sa siyudad sa Naga nga nahinabi sa Banat News ang nibutyag nga siya gi-teksan ni Davide nga patungahon sa kalihukan apan siya nitawag sa gobernador ug giklaro nga dili ba lain paminawon nga mag-abot sila sa orihinal nga sakop sa LP.

Hinuon ang gobernador nipahibawo nga kadto ra ang mga incumbent ang iya’ng gi-imbitar.

Gawas ni Alcoseba, si Mayor Johnny de los Reyes sa dakbayan sa Talisay ang wala nakatunga sa kalihukan.

Asoy ni Alcoseba nga nitunga siya o sa wala, tataw na ang iya’ng suporta ni Robredo ug ni Mar Roxas sa pagka-presidente ug dili siya sama ni Apura.

Si Apura ug ang iya’ng kompleto’ng line-up sa dakbayan sa Carcar ang gi-endorso ni Davide atubangan sa mga Carcaranons niadto’ng nilabay nga buwan.

Sila sa Alayon ang nagpakita og suporta sa LP bisan pa man sila kaalyado sa Nacionalista Party. (Gabriel C. Bonjoc/GMR)(BANAT NEWS)