Koryana gikawatan sa mall, CCTV hang-up

CEBU, Philippines - Nawad-an sa salapi, mahalong cellphone ug mga alahas ang usa ka Koryana human ang shoulder bag nga gisudlan niini ang gisakiyo sa mga sakop sa Salisi Gang sulod sa Koki –Q Restaurant sa Parkmall, dakbayan sa Mandaue alas 8 pasado sa niagi’ng Miyerkules sa gabii.

Si Police Officer 3 Arthur Cuyos sa Presinto 2 sa Mandaue City Police Office (MCPO) niila sa biktima nga si Jin Suk Kim, 39, minyo nga nagpuyo sa Mabolo, dakbayan sa Sugbo.

Matud ni Cuyos nga nangaon sa ila’ng panihapon ang biktima kuyog sa sakop sa pamilya sa mao’ng kan-anan.

Samtang nalingaw sila sa pagpangaon mao’y ila’ng namatikdan ang kalit nga pagkahanaw sa shoulder bag nga gisudlan sa kapin sa P10,000 nga salapi ug mahalon nga mga butang.

Si Cuyos niingon nga adunay close circuit television (CCTV) camera ang kan-anan apan diha’ng ila’ng gisulayan sa pagsud-ong dili usab nila maklaro ang mga panagway sa mga tawo nga nikuha sa mga butang sa biktima tungod kay ni-hang-up man kini atol sa hitabo. (Romeo T. Limpangog/GMR)(BANAT NEWS)