Kalag-kalag ipahimo nga solemne

CEBU, Philippines – Giawhag ni Auxiliary Bishop Dennis Villarojo sa Archdiocese of Cebu ang katawhan sa pagsaulog sa All Saints’ Day ug All Souls’ Day nga solemne.

Matud ni Villarojo nga labi’ng maayo nga saulugon ang duha ka selebrasyon subay sa Misteryo sa Apostles’ Creed.

Sumala pa ni Villarojo ang adlaw sa mga Santos ug Kalag dili panahon aron saulugon ug yukbuan ang mga dautan nga espiritu kung dili panahon kini aron makigsandurot sa mga Santos ug mag-ampo para sa mga nitaliwan nga sakop sa banay.

Ang pangulo sa Human Life International, Dr. Rene Bullecer, nitug-an sa Banat News nga dili siya pabor nga butangan og Free Wi-Fi connection ang mga sementeryo.

Matud ni Bullecer ang sementeryo sunod sa simbahan hinungdan ang kahilom ug kalinaw sa okasyon kinahanglang mapreserba ug magpabilin.

Dugang ni Bullecer nga mas maayo gani nga wagtangon ang signal sa cellphone sulod sa sementeryo aron makapangadye ug makapamalandong og tarung ang mga tawo nga mosulod.

Sumala pa ni Bullecer nga kung wala’y signal sulod sa sementeryo dili magdugay sa sulod ang mga tawo kay dili man kaagwanta nga wala’y signal hinungdan nga paspas ang turn over sa mga tawo kay sulod ug gawas ra ug dili maghuot sulod sa sementeryo.

Samtang ang pagpanawat og panuga ug pagtaud sa linya sa kuryente mao’y makita nga hulagway sa Carreta Cemetery.

Matud ni Susan Lim, administrador sa sam-ang, nga P250 ang bayad sa gusto’ng magpasuga sa ila’ng mga nitso.

Sumala pa ni Lim nga hugot nga seguridad ang ila’ng ipatuman sa sam-ang kauban ang kapolisan diin wala sila’y tugutan nga mga mahait nga hinagiban nga makasulod, wala’y tinda nga gitugutan sa sulod aron dili kini makahatag og kasamok ilabi na nga daghang mga tawo ang moanha sa sementeryo.

Dugang pa ni Lim nga wala usab sila’y mga lingkuranan, tent ug lamisa nga makasulod sa sementeryo aron dili makaali sa higayon nga adunay mga emerhensiya nga motumaw.

Matud ni Ondo Carbajosa, ang nagdala sa maintenance sa pagpanaud sa suga sa Carreta, nga karong Oktubre 31 sa alas 6 sa gabii ila na’ng sugdan ang pagpasiga sa mga suga hangtud sa kadlawon sa Nobiyembre 3. – /GMR) (BANAT NEWS)