Negosyante’g itoy gipusil patay

CEBU, Philippines – Patay ang usa ka negosyante og mahalon nga mga itoy sa Cotcot, lungsod sa Liloan diha’ng kalit lang gipusil sa makadaghang higayon sa tulo ka lalaki nga nagsakay og motorsiklo alas 12 pasado sa udto niadto’ng Domingo.

Si Senior Police Officer 4 Marcelino Servilla, chief investigator sa Liloan Police Station, niila sa biktima nga si Arestotol Benabaye, 36, nagpuyo sa mao’ng   dapit.

Matud ni Servilla nga nakighinabi ang biktima sa magtiayon nga kustomer nga sila si Joperbel ug Joan Welmida diha’ng kalit lang nitumaw ang tulo ka tawo kinsa ang duha nanaug sa motorsiklo ug nipusil sa biktima.

Ang biktima naigo sa dughan sa una’ng pagpamusil ug nakadagan   sa tindahan ni Marivic Formentera hangtud nga natumba.

Ang ikaduha’ng angkas nga lalaki nga nigukod ang nitiwas sa pagpusil sa kalawasan sa biktima gamit ang kalibre .45 nga armas.

Ang duha ka lalaki nagdali sa pag-angkas og balik sa nagpaabot nga motorsiklo ug nipabulhot pahilayo sa mao’ng dapit.

Ang pamilya nitug-an nga wala sila’y nasayran nga gikaaway sa biktima.

Samtang nakabaton og samad sa liog ug suwang ang usa ka tawo nga biktima sa pagpamusil sa silingan sa sitio Pag-utlan, Maslog, dakbayan sa Danao alas 10 pasado sa buntag niadto’ng Domingo.

Si Police Officer 1 Ferdinand Gonzales sa Danao City Police Station niila sa biktima nga si Jeffrey Lawas Labador, 36, ug ang suspek mao si Ryan Rota alyas Dido.

Matud ni Gonzales nga naglimpiyo sa motorsiklo sa tugkaran sa panimaye ang biktima diha’ng ang silingan kalit nga nitumaw ug dayong pamusil sa makaduha ka higayon.

Human sa pagpamusil nagdali sa pagsibat ang suspek ug ang biktima nga nakapangayo’g panabang ang gidala sa Danao Provincial Hospital.

Si Gonzales niingon nga ang karaang panagbangi sa biktima ug suspek ang hinungdan sa pagpamusil. – /GMR)  (BANAT NEWS)