Pagpalambo sa hayopan sa Sugbo gitinguha

CEBU, Philippines – Ang Provincial Veterinary Office (PVO) magpatukod  og artificial insemination heat center nga dugay na nilang giplano apan wala mahinayon tungod kay walay pundo. Si Dr. Mary Rose Vincoy, provincial veterinarian, mibutyag nga naapil sa Annual Investment Plan (AIP) ang PVO ug misugyot sila og P22 milyones nga budget alang sa development fund sa sunod tuig. Niining tuiga ang PVO duna lang kini P15 milyones nga development fund.

Ang P22 milyones igahin kini alang sa pagpatukod og artificial insemination heat center, pagpalambo sa tumoranan sa mga hayop ug pagpalit og mga ekipo aron mas paspas ang proseso sa artificial insemination technicians.

Matud ni Vincoy nga gilakip usab nila sa budget sa sunod tuig ang mga ekipo alang sa dairy aron mapalambo kini sa probinsiya. Subay niini, si Vincoy nagkanayon nga kaniadto ang ilang gi-focus ang mga gagmay nga hayopan sama sa kanding. Apan sa mosunod nga tuig mga dagkung hayopan na ang ilang i-focus sama sa baka ug kabaw.

Gipasabot niya nga sa dugay na nga panahon ang probinsiya wala’y distribusyon sa mga dagkong hayopan tungod kay wala kaayo'y suporta sa pagpalit og mga ekipo ug pagpatukod og pasilidad alang niini.

Subay niini, gawas sa P22 milyones sa 2016 annual budget ang PVO misugyot og P35 milyones nga budget alang sa regular operation diha sa ilang buhatan. Ang PVO niining tuiga duna lang kini P26 milyones nga budget alang sa regular operation sa ilang buhatan. – /EIM) (BANAT NEWS)