Dagkong bawod ug kusog ang hangin

CEBU, Philippines – Nanglupad ang mga atop sa mga balay sa sitio Litmon, barangay Poblacion, dakbayan sa Talisay atol sa paghapak sa kusog nga hangin dala sa bagyong Lando niadtong Domingo sa gabii ug kagahapon sa buntag.

Si Nilo Omay nagkanayon nga dali niyang gibalhin ang iyang sakyanan sa kahadlok nga malunopan kini sa tubig dagat tungod sa kadako sa bawod nga gihulagway niyang lapas sa mga balay.

"Bisan pa og naay seawall ang bawod pwerte gihapon mulampornas," matud pa ni Omay.

Si Danny Nebria uban sa iyang asawa ang naghinay-hinay sa pagpanghipos sa ilang mga butang nga nagkatag tungod sa maong hitabo.

Asoy pa niya nga nisulod gyud sa ilang panimay ang tubig sa dagat tungod sa kusog nga bawod dungan sa paglupad sa ilang atop.

Si Joel Baral sa iyang bahin nibutyag nga nagtukaw gyud sila tungod sa bati nga panahon. Iyang gipahiklin ang iyang asawa ug mga anak sa mas luwas nga dapit.

Samtang si Pedrita Capangpangan nga naabtan sa Banat News nga nagwaswas sa ilang mga senina nga nahumod sa tubig dagat kagahapon sa kaadlawon.

Nagpasalamat hinuon siya nga ilang sinina ra ang nabanlas sa bawod kaysa mga sakop sa iyang pamilya.

Ang mga lomulupyo sa lugar nanghinaot nga mahatagan og pagtagad sa mga opisyal ang ilang suliran labi na kung ang tubig moabot gyud sa ilang panimay ug dugay kining mahubas tungod kay way saktong kalutsan nga kanal.

Sumala pa ni Al Quiblat, pangulo sa PAGASA Mactan posibleng masinati pa hangtod sa adlaw nga Sabado ug Domingo ang kabangis sa bagyong Lando tungod sa hinay nga pag-irog niini. Ang maong bagyo dunay gikusgon nga hangin nga 120 kilometros kada oras ug huros sa hangin nga 150 kph ug nag-irog sa amihanan amihanang-sidlakan.

Matud pang Quiblat duha ka high pressure areas ug laing bagyo nga dunay international name nga Champi ang nasigpatan karon sa gawas sa PAR. Mao kini ang hinungdan nganong hinay ang pag-irog sa bagyong Lando.

Sumala pa ni Quiblat, ang hinay nga pag-irog sa maong bagyo posibleng moresulta gyud og mas dakong kadaot sa mga lugar nga maagian niini gumikan sa dalang kusog nga hangin ug uwan.

Ang Kabisay-an nakasinati karon og kusog nga hangin nga nasamotan sa hanging habagat.

Usa ka gale warning ang gipagawas sugod niadtong Biyernes ug gipanglantawan nga molungtad pa kini hangtud sa adlaw’ng Miyerkules.

Ang mga sakyanang pandagat nga dili gyud molawig tungod kay kusog ang hangin lakip na ang bawod gikan sa 3.5 meters ngadto na sa 5 meters.

Nasayran nga 2,430 ka mga pasahero ang wala makalarga sugod niadtong Sabado hangtod kagahapon sa buntag.

Nasayran nga 19 ka mga barko, tulo ka motorbancas, ug 14 ka mga rolling cargoes ang wala nilawig tungod sa gale warning.

Ang maong mga barko naggikan sa mga pantalan sa Cebu City, Argao, Bato, Bantayan, Camotes, Pantalan sa Danao, Hagnaya, Mandaue ug Naga City.

Lakip usab ang mga barko nga naggikan sa mga pantalan sa Tabuelan, Tangil, Tinago ug Toledo.

Sagad sa maong mga barko paingon sa Bohol, Leyte, Negros Occidental, Bacolod ug uban pa. - /EIM) (BANAT NEWS)