Nagtagay gipamusil sa ila’ng paryente
CEBU, Philippines – Gipamusil sa ila’ng paryente ang tulo ka manag-amigo nga nag-inom sa sitio Rattan, Tanke, dakbayan sa Talisay niadto’ng Biyernes sa gabii.
Nangalandig sa tambalanan sila si Jomar Daan, 31; Philip Sibuco, 28, ug Jovannie Villaver, 30, pulos nagpuyo sa nahisgutang lugar samtang ang mga suspek giila nga sila si Cliffors Salibay ug Carlos Villaver.
Si SPO1 Mikie Espina sa Talisay City Police niingon nga nag-inom ang tulo ka managhigala diha’ng kalit nga niabot ang duha ka suspek dayun rakrak gamit ang .45 kalibre sa armas.
Matud ni Espina nga nagpunay og pabuto ang duha ka suspek hangtud nga nangahagba ang mga biktima.
Nagkanayon si Espina nga paryente ra ang biktima ug mga suspek ug dili ni sila ig-layo sa napatay nga notado’ng kriminal nga si Richie Daan.
Hinuon gipasabot sa kapolisan nga ang motibo sa pagpamusil mao ang atraso ug nakursonada tungod sa paggamit og ilegal nga drugas.
Gidala sa Talisay City District Hospital ang mga biktima ug gibalhin sa Don Vicente Sotto Memorial Medical Center.
Si Espina niasoy nga si Jomar ang nagrabehan sa pagpangatake human kini naigo sa iya’ng tiyan, tiil ug bukton.
Pipila ka oras ang nilabay, nasikop sa mga awtoridad si Carlos ug gibalhug sa bilanggoan ug gikatakda’ng pasakaan og kaso ang mga suspek. (BANAT NEWS)
- Latest
