SRP developers di na mogasto sa drainage plan?

CEBU, Philippines – Pakigtagboan ni Mayor Michael Rama ang mga developers sa South Road Properties nga maoy gihangyo sa kagamhanan nga motabang aron mabutangan og Total Drainage Master Plan sa maong lugar.

Kini human dunay nigawas nga balita nga giingong dili na abagahon sa mga developers ang gastos sa maong proyekto tungod kay aduna na may pundo ang siyudad alang niini. Usa sa problema sa SRP mao ang paglunop sa tubig kun ting-uwan ug gipangitaan kini daan og solusyon samtang wala pa hingpit mangabli ang mga establisamentong gipangtukod sa maong dapit.

Si Rama nagkanayon nga dili na mohimo ang maong developer sa hangyo sa siyudad apan buot niya silang pakigkitaan pagbalik sunod semana.

Apan si Atty. Jose Marie Poblete, hepe sa City Engineering Office sa iyang bahin nibutyag sa Banat News nga malangan ang maong proyekto.

Gibutyag ni Poblete nga ang mao untang proyekto usa ka Public Private Partnership tali sa developer ug sa siyudad.

Si  Poblete nagkanayon nga kinahanglan og eksperto alang sa ingon niini nga proyekto ilabi na nga reclaimed area ang SRP.

Samtang gipahibalo ni Roberto Varquez ,ang manager sa SRP nga duna na silay nakit-ang consultants nga mohimo sa maong plano apan wa pay budget alang niini nga mobalor P2 milyones.

Matud niya, kun ugaling   ang pundo sa iyang buhatan ang kuhaan sa pundo kinahanglan kini og approval sa konseho.

Apan si Filinvest Area Manager Engr. Allan Alfon nagkanayon nga wa sila mag-ingon nga miatras sila sa maong proyekto kay matud niya nagpadala lamang sila og suwat ngadto sa mayor aron pagpangayo og assistance gikan sa kagamhanan sa Sugbo.

Samtang ang tigpamaba sa FLI nga si Cerwin Eviota miingon nga ang suwat nga gipadala ngadto sa mayor naghangyo lang nga i-prioritize una sa syudad ang uban nga proyekto diha sa SRP.

“The only letter we know of, is the  letter dated Oct. 4 asking the city to prioritize some projects sa SRP,” matud ni Eviota. - /EIM) (BANAT NEWS)