CEBECO II office gitulis

CEBU, Philippines – Padayon pa karon ang imbestigasyon sa Tabogon Police Station labot sa pagtulis sa Cebu Electric Cooperative II satellite office sa Poblacion sa mao’ng lungsod sa niagi’ng udto.

Sumala pa ni SPO3 Sonny Ceniza, desk officer sa Tabogon Police Station, nga tibuok adlaw kagahapon gilakaw ni SPO1 Gregorio Licayan, imbestigador, aron makuha ang dugang impormasyon sa pagpanulis.

Dugang ni Ceniza nga pasado alas 12 sa udto wala nakabantay ang security guard sa mao’ng satellite office nga mga tulisan na diay ang nisulod sa opisina.

Nagtuo lang si Tirso Montero, 42, nga mga kliyente sa CEBECO II ang lima ka lalaki nga nisulod sanglit wala kini nagtaptap sa nawong.

Apan gidis-armahan siya sa usa sa mga tulisan sa iya’ng 12-gauge nga shot gun ug ang tulo ka armado sab mao’y nition ngadto sa agtang sa mga kahero ug nideklarar nga tulis.

Ang usa mao’y nagsilbi’ng look-out sa mga tulisan ug nagpabilin kini sa gawas aron makasinyas dayon kung adunay tawo o polis nga mopadulong sa lugar.

Wala’y nahimo sila si Felix Purgnaria, Joseph Dignos ug si Lindey Ursal tungod sa ila’ng kahadlok nga patyon sila sa mga tulisan.

Gimanduan sa armado’ng mga lalaki ang mga kahero nga habwaon ang sulod sa kaha ug ihatag kini kanila.

Nakadagit gyud og P554 mil ang mga tulisan nga nipasirit og padagan sa ila’ng tulo ka motorsiklo.

Kagahapon gisusi og usab sa mga imbestigador ang lugar nga nahitaboan ug ang mga tawo nga posibleng nakaila sa mga suspek.

Daghan pa karon ang gitan-aw sa kapolisan ug wala’y hunong ang ila’ng pagkuha og mga testigos ug ebidensya aron masulbad ang mao’ng pagpanulis. - /GMR) (BANAT NEWS)