Permit sa tighimo sa pabuto gikanselar

CEBU, Philippines – Gikanselar sa kagamhanan sa dakbayan sa Lapu-Lapu ang lisensya sa negosyate og pabuto nga si Juliet Wahing tungod sa pagkamatay sa 8 anyos nga bata dihang nabuthan sa produkto niini.

Ang maong aksidente nahitabo atol sa pista sa sitio Purok 3, barangay San Miguel, lungsod sa Cordova sa miaging semana.

Ang maong negosyo ginganlan og "Juliet M. Wahing Pyrotechnic Manufacturing" diin nahimutang sa Purok Judas Belt, Barangay Babag sa maong siyudad.

Nasayran sa miaging Septiyembre 28 sa gabii, gikuha ang serbisyo ni Wahing aron pagpabuto og pyrotechnics alang sa usa ka fireworks display.

Duha ka mga sakop ni Wahing maoy gitahasan niini aron mopabuto apan usa sa mga pabuto ang gikatahong didto napunta sa batang si Sam Monteron kinsa nagtan-aw lang unta sa pabuto.

Namatay ang bata tungod sa naangkong kadaot sa iyang tiyan human nabuthan og "bombshell."

"It is needless to state that in dealing with this business, utmost prudence should be observed that measures on safety are on place," matud pa sa kamandoan ni City Mayor Paz Radaza.

Nasayran ‘sab sa pakisusi sa dakbayan nga wala na-renew ni Wahing ang iyang permit sa Philippine National Police.

"The business permit issued in your favor on January 14, 2015 is hereby revoked. You are hereby ordered to immediately cease and desist from operating your business," dugang sa         maong order sa city government.

Matud pa ni Radaza, estrikto ang gobiyerno sa mga rekisitos  sa mga gustong magnegosyo og mga pabuto tungod kay gikonsiderar kining "high risk" sa publiko. – /EIM) (BANAT NEWS)