Villarante andam motapon kang Poe

CEBU, Philippines – Naghunahuna na si Bise Mayor Romeo Villarante sa siyudad sa Talisay nga magpapili pagkamayor nga mopasakop unya sa pundok ni Senador Grace Poe sa sunod tuig nga eleksyon.

Kini human si Villarante nibuwag na sa Liberal Party tungod sa pagpili sa partido kang Mayor Johnny De los Reyes tungod sa polisiya nga equity of the incumbent.

Hinuon gipasabot ni Villarante nga bisan pa man ug wa na siya sa LP suportahan gihapon niya sila Gov. Hilario Davide III ug si Abe Canoy pagka kongresista sa unang distrito.

"Sa akong personal (intensyon), inclined gyud ko ni Grace Poe kay wa pay isyu nga nadungog kalabot sa iyang political career," matud pa ni Bise Mayor Villarante.

Siya nagkanayon nga wa pa gyud sila personal nagkaestorya apan aduna lay mga kaila ni Poe nga nitawag kaniya. Apan giklaro niyang andam usab siyang modagan bisan independente.

Sa nasayran si Villarante giagni na sa kampo ni Bise Presidente Jejomar Binay. Si Villarante ang magmayor uban sa iyang bise mayor nga si Konsehal Danny Caballero.

Samtang si De Los Reyes magpapili pagbalik ug iyang bise si Konsehal Valeriano Ylanan.

Si kanhi kongresista Eduardo Gullas kinsa maoy nakapahimo sa Talisay nga usa ka siyudad modagan kapares si kanhi bise mayor Alan Bucao sa Alayon party. (Gabriel Bonjoc/EIM)

Nangaraan sa trabaho gipasidunggan

Gipasidunggan sa siyudad sa Toledo ang mga empleyado sa kagamhanan sa dakbayan nga niabot na og 30 ka tuig atol sa gipahigayong culminating activities sa Civil Service Month.

Ang nakadawat og Exemplary Employees Award sila si Ma. Lourdes Medel sa Department of Education; Rodrigo Zamora sa Toledo City Water District ug si Maria Conception Caserial sa City Agricultural Services.

Ang maong mga empleyado ang gipili sa tagsa-tagsa nila ka opisina pinasubay sa usa sa mga criteria nga gisumitir sa buhatan ni Edwin Abad, ang labaw  sa Human Resource Development Office.

Si Abad nagkanayon nga sagad sa nahatagan sa mga award ang anaa lang sa mga lokal nga buhatan.

Lakip usab sa mga gipasidunggan ang 16 ka mga retiradong kawani sa lokal nga kagamhanan sa dakbayan sa Toledo. – /EIM) (BANAT NEWS)