Fireworks nipatay og bata

CEBU, Philippines – Patay ang usa ka 8- anyos nga bata dihang nabuthan sa natumba nga pabuto nga alang unta sa fireworks display atol sa ilang fiesta mass sa Purok 3, barangay San Miguel, lungsod sa Cordova sa miaging Lunes, alas 8 sa gabii.

Si Sam Monteron, residente sa nahisgutang barangay daling gidala sa Lapu-Lapu City Hospital human nakaangkon og samad sa tiyan apan gideklarar kini nga dead-on-arrival.

Matud ni Police Officer 3 Alex Noron sa Cordova Police Station, si Monteron, usa ka grade 1 student sa Pilipog Elementary School ang naglakaw-lakaw human sa gipahigayon nga misa sa dihang aksidenteng mibuto ang maong pabuto nga ginganlan og “bombshell” padulong   kaniya.

“Instead nga molupad ug mobuto sa taas, naay usa ka pabuto nga horizontal ang pagbuto, paubos ba unya accidentally naigo ang bata,” matud ni Noron nga nakighinabi sa Banat News. Nagkanayon si Noron nga samtang naglakaw sa dalan ang bata, gipangita sab kini siya sa iyahang ginikanan apan nakurat sila human nakit-an ang kahimtang sa ilahang anak nga napuno og samad.

Dugang sa polis, nakaestorya pa ang bata sa iyahang ginikanan samtang padulong sa tambalanan apan namatay kini dayon.

Gibalhog dayon sa kapolisan ang duha ka fireworks operator nga sila si Joseph Berdin, 29, ug Jason Tuquib, 31, pulos mga residente sa barangay Babag, dakbayan sa Lapu-Lapu nga maoy gitahasan sa pagpabuto sa fireworks. Ang duha trabahante ni Juliet Wahing kinsa maoy gikatahong tag-iya sa maong fireworks nga pabuthon.

Base sa pakisusi sa polis, duha ka klaseng fireworks ang ilang gigamit nga ginganlan og “thunder” ug “bombshell” nga mokantidad gikan sa P7,000 hangtud P8,000 sulod sa upat ngadto sa lima ka minutos.

Dugang ni Noron, si Wahing andam mohatag og hinabang sa pamilya ni Monteron ug makig-areglo tungod kay aksidente man ang nahitabo.

Sigon pa sa inahan sa bata nga si Michelle Alia, igo lang nagtan-aw sa fireworks display ang iyang anak kauban ang iyang ig-agaw.

Gumikan sa nahitabo sa iyang anak, nanawagan kini og hustisya sa kamatayon sa bata ug tinguha niini masayod kun si kinsa gyud ang sad-an sa maong panghitabo.

Tungod sa nahitabo, gimandoan ang Firearms Explosive Unit-7 sa Police Regional Office (PRO)-7 sa pagsusi sa palpak nga fireworks display.

Si Senior Superintendent Rey Lyndon Lawas, Chief of Staff sa PRO-7 miingon nga usa sa ilang sutaon kun adunay permit to display ang manufacturer. Matud ni Lawas manubag gihapon ang tag-iya nga si Juliet Wahing sanglit dunay nakalas nga kinabuhi ug nakaangol usab kini og mga tawo nga anaa sa maong lugar atol sa kalihukan.

Si Lawas kanhi hepe usab sa Firearms Explosives Security and Guards Supervisory Section-7 (FESSAGS-7) nagkanayon dunay proseso ang pagpahigayon og fireworks display.

Matud niya kinahanglang adunay permit gikan sa PRO-7, Bureau of Fire Protection ug  sa local police station pagsiguro nga way madisgrasya atol sa maong kalihokan.

Kun masuta nga wala makatuman ang supplier sa mga pabuto mahimo silang makasohan. – /EIM) (BANAT NEWS)