Negosyante gipusil sa tulisan
CEBU, Philippines – Grabeng naangol ug nalandig sa tambalanan ang negosyanteng babaye nga tag-iya sa usa ka botika human kini gipusil sa mga tulisan nga nitulis kaniya diha sa barangay Gansaga sa Consolacion.
Ang biktima mao si Charmine Lumapas, taga barangay Mantuyong, dakbayan sa Mandaue ug nagdumala sa Bing Pharmacy sa nahisgotang lungsod.
Si Police Officer 1 Socrates Borinaga sa Consolacion Police Station miingon nga gikan pa nga nanira ang biktima sa ilang botika ug nagbarog kini daplin sa karsada nga nagpaabot og taxi nga masakyan. Apan kalit lang mitumaw ang wala mailhing lalaki ug gibunlot ang shoulder bag niini nga gisudlan sa P51 mil nga halin sa botika.
Apan nagdumili kini pagbuhi sa bag hinungdan nga gipusil siya sa tulisan diha sa lawas ug pagkahagba sa ubos, gikuha sa tulisan ang bag ug miikyas.
Nagtuo ang kapolisan daan nang gipanid-an sa maong tulisan ang naandan nga pagpanirado sa botika.
Si Senior Inspector Wilson Abot nga maoy hepe sa kapolisan sa maong lungsod namasin pagpangita og footage gikan sa closed-circuit television (CCTV) camera diha sa palibot aron sa pag-ila sa tulisan. – /EIM) (BANAT NEWS)
- Latest
