Hybrid bus OK sa konseho

CEBU, Philippines – Makaangkon na ang Sugbo og usa ka hybrid nga klase sa bus nga magdagan sa nagkalain-laing dapit.

Gitugutan na sa konseho sa dakbayan sa Sugbo si Mayor Michael Rama nga mopirma og kasabutan sa Premier Southern Corporation (PCS) kalabot sa pagtukod og mga stations sa rota sa High Quality Public Transport System (HQPTS) ug sa maintenance sa HQPTS service station.

Kini subay sa plano sa Bus Rapid Transit (BRT) system sa dakbayan sa Sugbo. Base sa kasabutan kinahanglan nga mo-operate ang PCS sa mga giaprobahan nga rota sa Department of Transportation and Communication diin adunay 77 ka bus nga mobiyahe sa upat ka lain-laing rota diin 36 gikan sa North Bus Terminal paingon sa Mambaling via SRP, 11 gikan sa Talisay paingon sa Mambaling via SRP, 22 gikan sa North Bus Terminal paingon Talisay via SRP ug walo sa Talisay paingon Airport via SRP.

May walo ka bus stations nga mahimutang sa  SM Seaside City sa SRP, SM City Cebu North Reclamation Area, South Coastal Road duol sa Fort San Pedro, duol sa Compaña Maritima, N. Bacalso Avenue duol sa Cebu Institute of Technology-University, City de Mari’s residential area ug sa II Corso. – /GMR) (BANAT NEWS)