Abu Sayyaf dunay target sa Dumaguete City
CEBU, Philippines – Ang kasundalohan mipahugot sa ilang pagpaniid tungod sa nadawat nilang report nga dunay grupo sa Abu Sayyaf nga gipangulohan ni Muammar Askali nga giingong nagplano sa pagdagit og negosyante sa Dumaguete City, Negros Oriental.
Kini bisan pa man sa pangangkon sa Police Regional Office -7 nga luwas pa gihapon ang Kabisay-an gikan sa bisan unsang hulga ilabi na nangandam na sila sa ikaduhang hugna sa Asia Pacific Economic Cooperation (APEC) Summit.
Sa report ni Capt. Nell Brian Cebrian, operations officer sa 302nd Brigade Philippine Army kini nagkanayon nga ang grupo ni Askali motuyo og anha sa maong siyudad aron dagiton ang usa ka negosyante.
Matud ni Cebrian nga duha ka report niadtong Septiyembre 10 ug 14, 2015 ang ilang nadawat kabahin sa plano sa Abu Sayyaf.
Gibutyag ni Cebrian nga mga sakop sa 302nd Brigade sa Philippine Army ang gipakatap sa habagatang bahin sa Negros Oriental ilabi na sa Dumaguete City paingon na ngadto sa lungsod sa Siaton.
Gawas niini, upat ka Philippine Navy vessel ang nagpatrolya na diha sa habagatang bahin sa kadagatan, Cebu, Negros Oriental, Siquijor ug Panglao, Bohol.
Matud usab ni Cebrian nga ang kapolisan, lokal nga kagamhanan ug kasundalohan nagtinabangay alang sa higpit nga seguridad sa lugar.
Subay niini, si Col. Allan Martin, commander sa 302ndBrigade sa Philippine Army mibutyag nga langyaw nga negosyante ang ilang target. Samtang si Senior Superintendent Rey Lyndon Lawas, Chief of Staff sa PRO-7 miingon nga kabahin sa ilang pagpangandam sa seguridad sa APEC meet nga mahitabo sa Oktubre 8 hangtod na sa petsa 14 ang seguridad sa tibuok Central Visayas.
Gimandoan usab ang Provincial Police Directors sa Negros Oriental, Siquijor, ug Bohol nga alertuhon ilang mga sakop lakip ang mga resort owners aron palig-unon ilang seguridad apil na ang pag-organisar sa mga mananagat aron makatabang sa pagpaniid sa ilang kadagatan. (BANAT NEWS)
- Latest
