Truck hapit nahagbong sa flyover

CEBU, Philippines – Hapit nahagbong sa flyover sa Maguikay, dakbayan sa Mandaue ang Isuzu dump truck nga nakabangga og motorsiklo ug swerte nga nasangit sa railings.

Si Police Officer 2 Rolando Guilledo, field investigator sa traffic division sa Mandaue City Police Office (MCPO), niingon nga ang dump truck nga may plate number 7MC 126792 gimaneho ni Renato Racaza, taga Jaclupan, Dakbayan sa Talisay.

Gikan sa Consolacion ang truck alas 5 pasado ang takna sa buntag kagahapon ug sa ibabaw nga bahin sa flyover, kalit gikasugat ang Honda nga motorsiklo nga giluwanan ni Alexander Coraton, 48, taga Cansaga, Consolacion. Si Guilledo niingon nga nakabaton og mga bun-og sa kalawasan ang nagluwan sa motorsiklo ug gidala sa Mandaue City Hospital ug ang drayber sa truck nga wala naangol ang dali nga nakasibat.

Nagtuo si Guilledo nga kusog nagdagan pagsaka sa flyover ang truck dihang gikasungag ang motorsiklo ug dali nga nagangi ang manobela sa paglikay hinungdan sa pagbangga niini ngadto sa railing.

Si Dino Bargamento sa command center sa dakbayan niingon nga ang mao’ng aksidente ang hinungdan sa nasinati nga panaghuot sa mga sakyanan sa dalan M.C. Briones ug M.L. Quezon sa Barangay Maguikay.

Dugang ni Bargamento nga alas 8 na pasado sa buntag nasulbad ang panaghuot sa mga sakyanan diha’ng ila’ng gikuha ang truck. – /GMR) (BANAT NEWS)