Traffic scheme sa Mabolo ug NRA ipadayon

CEBU, Philippines - Gisugdan kagahapon ang experimental traffic scheme nga gihimo sa Cebu City Transportation Operation (CTTO) diha sa kadalanan sa Mabolo ug North Reclamation Area.

Nasayran sulod sa 30 ka adlaw ang pagpatuman niini ug maapektahan ang mga jeep pasaheroan nga nasubay sa maong mga rota.

Nagkanayon ang Operations Chief sa CCTO Joy Tumulak, gamay ra kini nga kausaban nga ang tumong nga mamenusan ang mga sakyanan nga moagi sa dalan Juan Luna Avenue, motuyok sa SM City Cebu ug lapos sa S. Osmeña Boulevard.

Nasuta nga ang dalan J.L Briones ug J. de Veyra ang kasamtangan nga giagian karon sa mga PUJ samtang ang dalan Andres Soriano ang wala una paagi-i gumikan sa nagpadayon nga road project sa lugar.

Hinuon, duna gihapon makasulod sa terminal sa SM apan pipila lang ang gitugotan.

Ang rota nga 03Q, 03A ug 04L moagi gihapon sa J. Luna paingon sa Ayala, Ayala paingon sa SM ug paingon sa Lahug.

Aduna sila'y mga gipakatap nga signages aron mahibaw ang driver sa tukma nga kaagian.  Samtang ang jeep nga mobiyahe sa Mandaue diha sa dan Gil Tudtud moagi kilid sa simbahan sa Mabolo. (BANAT NEWS)