Osmeña Day gisaulog

CEBU, Philippines - Gisaulog kagahapong adlawa sa Sugbo ang ika-137 nga adlaw nga natawhan sa gibansagang “Grand Old Man of Cebu” nga si Don Sergio Osmeña, Sr..

Ang iyang apo nga si kanhi kongresista Tomas Osmeña maoy pinasidunggang dinapit sa pagsaulog sa Kapitolyo sa maong selebrasyon kagahapon.

Ang kanhi kongresista miklaro nga dako na ang natampo sa iyang apohan sa Sugbo dihang usa pa kini ka batan-on ug dili lang dihang tiguwang na kini.

“Sorry na lang if I disagree with you that you refer to Don Serging as the Grand Old Man of Cebu because to me he is the Grandest  Youngman that we will never have,”  ni Osmeña pa.

Kaniadtong 27-anyos ang pangidaron ni Don Sergio dihang napili siyang gobernador sa Sugbo.

Wala pay duha ka tuig human sa pagpili ni Don Sergio isip gobernador ang gobiyerno sa US mihatag og pagtugot sa Pilipinas nga makatukod og kaugalingong gobiyerno ug namugna ang unang Philippine Assembly.

Ang unang Philippine Assembly election napahigayon niadtong Hulyo 30, 1907 ug usa si Sergio mao ang labing batan-on nga miyembro niini ug siya’y napiling unang Speaker of the House sa edad nga 29-anyos, ug nagpabilin siya sa maong posisyon sud sa upat ka termino.

“Karon we call him the Grand Old Man of Cebu pero para kanako if we look back in the past many of our greatest Filipinos were young people, right now we can only elect a president who is a lolo, unya murag dili ta makasalig sa atong kabataan,” ni Osmeña pa.

Si Osmeña nagkanayon nga kinahanglang dili balewalaon ang importansya sa kabataan karong panahona tungod kay kaniadto, ang kabataan maoy dako og natampo sa kasaysayan sa nasud.

Ang dakbayan sa Sugbo usab mipasidungog kagahapon kang Sergio nga gipangulohan ni Cebu City Acting Mayor Edgardo Labella kauban ang mga kaliwatan sa mga Osmeña. Si Labella mihulagway kang Sergio nga usa ka halangdon, maayong lider ug tinud-anay nga  suloguon sa publiko.

Matud ni Labella kinsa pangulo sa Cultural and Historical Affairs Commission (CHAC) sa dakbayan, hangtud karon gitagamtam sa mga Sugboanon ang natampo ni Sergio.

Samtang ang apo ni Osmeña nga si Margarita Osmeña Larrañaga nanghinaot nga dili makalimtan ang iyang apohan isip Presidente sa Pilipinas ug unang Cebuano nga nahimong   pangulo sa nasud.

Ang kalihokan gilangkoban sa paghalad og buwak ngadto sa iyang monumento sa eskina Lapu-Lapu ug Osmeña Boulevard. (BANAT NEWS)