Dispatser gidispatsar

CEBU, Philippines – Nalubong ang upat ka bala sa ulo sa usa ka dispatser sa Osmeña Boulevard, San Roque, dakbayan sa Sugbo pasado alas 6 sa nakalabay nga gabii human gipusil sa nag-helmet nga tawo.

Giila ang biktima nga si Lito Abella, 31, taga barangay Sto. Niño.

Matud ni Senior Police Officer 2 Rommel Bancog, imbestigador sa homicide section sa Cebu City Police Office, nga nahinabi sa Banat News nga nagpaabot nga adunay moparada nga sakyanan ang biktima samtang nakig-estorya sa amigo nga guwardiya nga si Colin Ruiz.

Kalit lang niabot ang usa ka motorsiklo diin ang backrider nga nag-helmet ang niduol dayun pusil sa ulo sa biktima upat ka higayon.

Si Bancog niingon nga atol sa hitabo wala nakalihok ang guwardiya nga gika-estorya ug wala na gani nisuway pa sa pag-ibot sa dala nga armas.

Yano ra kaayo nga nibiya ang gunman sakay sa motorsiklo.

Suway pa unta nga gidala sa mga sakop sa Cebu City Emergency Medical Services (CCEMS) ang biktima sa Cebu City Medical Center (CCMC) apan patay na kini nga naabot sa tambalanan. – /GMR) (BANAT NEWS)