Nasikop sa checkpoint may armas, shabu
CEBU, Philippines – Nasikop sa Pardo Police Station ang lima ka tawo atol sa buwag nga checkpoint niadto’ng Sabado ug Domingo nga gipangulohan sa hepe nga si Chief Inspector Michel Angelo Beltran.
Una’ng nasikop niadto’ng Sabado sa hapon sila si Erwin Auguis Galao, 20, taga sitio Ufeba, Bulacao ug Ackie Badana Dacalos, 21, taga dalan M. Dacalos.
Matud ni Senior Police Officer 1 Vicente Espenido Jr, desk officer sa Pardo Police Station, aksiyon unta nga mosibat ang mga dinakpan kay may dala’ng duha ka mga putos nga drugas.
Ikaduha’ng nasikop alas 3:15 sa hapon sa adlaw nga Domingo tungod sa paghupot og P3,000 nga peke nga kwarta mao si Mylene Nueve Andrade, 35, dalaga nga taga sitio Cabangcalan, Cogon Pardo, dakbayan sa Sugbo.
Matud ni Espenido nga nahadlok si Andrade ug gikumot pag-ayo ang kwarta ug sa pagsusi sa kapolisan nakita nga pulos peke. Si Andrade namahayag nga dili iya ang kwarta ug igo ra siya gipahupot sa iya’ng kapuyo nga usa ka bangkador sa sugal.
Si Andrade nagpaabot na lang sa unsa’y resulta sa iya’ng gidangatan aron usab mabuwag siya sa mga problema.
Alas 3:45 sa hapon gituohan nga mga gun-for-hire ang nakuhaan og armas lakip ang mga bala. Ang nasikop naila nga sila si Joe Bryan Caparida Caballero, 22, taga sitio Antipolo, Lawaan, Talisay City ug Joseph Pelayo Esmajer, 31, taga San Miguel, Linao, sa mao’ng dakbayan.
Nakuha gikan kang Caballero ang usa ka Armscor .9mm caliber pistol nga adunay serial number 1587554 kauban ang duha ka magazine, napulo ka bala ug duha ka putos nga shabu.
Nakuha usab kang Esmajer ang usa ka magazine sa .9mm nga puno sa bala, laing siyam ka bala ug gamit para suyop. Si Caballero niangkon nga siya ang nagdala sa armas apan iya kini sa iya’ng amigo nga giprenda.
Dugang ni Caballero nga dili sila gun-for-hire ug mga tulisan. – /GMR) (BANAT NEWS)
- Latest
