Biyudo nga pusher nasikop

CEBU, Philippines – Nadakpan sa kapolisan sa Talamban Police Station ang usa ka gidudahang tigpayuhot og ilegal nga drugas sa buy-bust operation sa Purok 5, San Jose, dakbayan sa Sugbo pasado alas 8 niadto’ng nakalabay nga buntag.

Giila ang dinakpan nga si Ronilo Bontilao, 40, biyudo ug nagpuyo sa mao’ng dapit.

Matud ni Police Officer 1 Gringo Muldez, desk officer sa Talamban Police Station, nga human sila nakadawat og impormasyon gikan sa mga residente labot sa ilegal nga kalihukan ni Bontilao, dali sila nga naniid.

Gamit ang P200 nakapalit og usa ka gamay nga pakete sa gituohang shabu ang asset sa kapolisan gikan ni Bontilao ug dayun kini gidakop.

Nakuha sa kapolisan gikan sa suspek ang laing unom ka gagmay nga pakete ug tulo ka medium-sized nga nitimbang og halos usa ka gramo.

Kaso’ng pagbaligya ug paghupot og drugas ang ipasaka sa kapolisan batok ni Bontilao kinsa kasamtangan karo’ng gitanggong sa selda sa Talamban Police Station. – /GMR) (BANAT NEWS)