Gallery, Art exhibit gibuksan sa kapitolyo

CEBU, Philippines - Subli’ng gibuksan kagahapon sa hapon ang Governor’s gallery sa Kapitolyo ug ang art exhibit sa mga inila’ng artista sa Sugbo.

Kini kabahin pa sa kalihukan sa ika-446 nga founding anniversary sa probinsiya niadto’ng Agosto 6.

Si Gobernador Hilario Davide III nibutyag nga ang iya’ng asawa nga si Jobel ang nisugyot nga buksan  pag-usab ang gallery tungod kay lakip kini sa kasaysayan sa Kapitolyo.

Sa gallery nahimutang ang mga hulagway sa tanang gobernador sa probinsiya sa Sugbo ug lakip na ang ila’ng nahimo.

Si Bokal Celestino Martinez III ang nisugyot sa pagpahigayun sa art exhibit sa Social Hall dungan sa subli’ng pagbukas sa gallery.

Ang mga paintings sa art gallery ipamaligya kini ug adunay bahin ang Liga ng mga Barangay nga gipangulohan ni Martinez.

Usa sa mga inila’ng pintor sa Sugbo nga si Luis King nibutyag sa mga tigbalita nga sulod lang sa tulo ka adlaw ang mao’ng painting exhibit.

Ang mga paintings naglakip sa mga nindot nga talan-awon o mga lugar sa Sugbo, kultura’ng Sugboanon ug mga landmarks.

Si King ang founder sa Nueves Art Group nga natukod niadto pa’ng tuig 2010 nga may siyam ka Sugboanong pintor nga sakop ug mao’y gipasabot sa “nueve.”

Si King 2nd placer kaniadto sa Mount Manunggal Art Competition niadto’ng 2013.

Lakip sa mga artists nga ni-exhibit sa ila’ng paintings ang duha ka higayun na nga world champion artist nga si Orley Ypon, 30, lumad nga taga Mainggit, dakbayan sa Toledo.

Laing artist mao si Jose “Kimsoy” Yap, 78, kinsa nag-eskwela og painting sa New York sa nilabay’ng 17 ka tuig ug nagtudlo og art sulod sa 35 ka tuig ug karon mao’y dean sa College of Fine Arts sa University of San Carlos.

Si Martinez sa iya’ng bahin nagkanayun nga ang gipang-exhibit nga paintings naghulagway kini sa kultura ug inadlaw nga gimbuhaton sa mga Sugboanon.

Lakip sa painting nga gi-exhibit ang naguba sa kusog nga linog nga kampanaryo sa Basilica Minore del Santo Niño. (BANAT NEWS)