Unom ka nadakpang tulisan, goons?

CEBU, Philippines - Unom ka mga gidudahang tulisan ug sakop sa guns for hire ang nasikop diha sa Brgy. Arpili sa lungsod sa Balamban atol sa hiniusang pagpangronda nga gihimo sa Special Weapons and Tactics (SWAT) sa lungsod sa Balamban ug Toledo inabagan sa mga sakop sa Special Force sa Philippine Army sa nakalabay nga hapon. Ang mga dinakpan naila nga sila si Jose Montero, 41,  Arnel Nacion, 39, Billy Cañedo, 25, Federico Dacallos, 34, Lourdesillo Cabaron, 38, ug Julius Cesar Climaco, 20. Nasikop ang unom sa balay ni Montero.

Sumala pa ni Police Officer 1 Monchito Plarin ang desk officer sa Balamban Police nga nahinabi sa Banat News adunay nakahatag og impormasyon nga nasigpatan ang maong armadong grupo sa maong dapit.

Aron pagsiguro nga dili sila makaeskapo, ang mga special units sa kapulisan ug kasundalohan ang gipadala sa maong dapit.

Sumala pa nga naabtan ang grupo nga nanglimpyo sa ilang mga armas hinungdan nga wa sila makalihok.

Niadtong nakalabay nga adlaw usa ka salesman sa ilimnong makahubog ang gitulis sa tulo ka mga armadong tulisan diin ang maong grupo ang gitudlong mihimo sa maong krimen.

Ang maong grupo ang gitudlong responsable sa sagunson nga tulis sa Balamban, dakbayan sa Toledo ug mga kasikbit nga dapit.

Nakuha sa mga otoridad gikan sa mga suspetsado ang usa ka .38 revolver, duha ka .357 revolver, usa ka .45 caliber pistol, usa ka KG9 submachine pistol, usa ka granada, mga bonnets, jackets, duha ka motorsiklo ug mga pinaketeng gituohang shabu.

Ang direktor sa kapulisan sa Cebu Provincial Police Office, Sr. Supt. Noel Gillamac miingon nga gawas sa pagpanulis, gidudahan ‘sab  sila nga sakop sa guns for hire nga ubos sa pagdumala sa usa ka politiko sa ikatulong distrito nga wa pangalani ni Gillamac. Ang mga nasikop ug mga ebidensiyang nasakmit gikatahong mihaom gayod sa paghulagway sa mga nabiktima sa mga tulis sa maong dapit.

Ang mga nakuhang armas ug mga bala ipaubos sa ballistic examination aron masubay kun kini nagamit sa ubang mga krimen.

Si Mayor Ace Binghay sa lungsod sa Balamban mihangop sa kalampusan sa kapulisan ug sa Philippine Army nga nagbase sa iyang lungsod tungod sa pagkasikop sa grupo.

Matud pa ni Binghay, dako kaayo og epekto  sa peace and order sa lungsod ug sa mga silingan nilang mga dapit ang pagkasikop sa unom. Ang lungsod nagplanong mohatag og pahalipay sa mga tinugyanan sa balaod karong mosunod nga mga adlaw tungod niini. (BANAT NEWS)