Kalambuan giyagyag ni Radaza sa SOCA

CEBU, Philippines - Gipasigarbo ni Lapu-Lapu City Mayor Paz Radaza ang pagbalik sa pagsalig sa mga investors nunot sa maayo’ng pagdumala sa dakbayan.

Kini atol sa iya’ng ika-upat nga State of the City Address (SOCA) diin gi-highlight sa mayor nga wala’y mabiyaan nga Oponganon samtang padayung molambo ang dakbayan.

Gitataw ni Radaza nga dili niya ihunong ang pagpanghatag og cakes sa mga senior citizens sa dakbayan tungod kay naghatag kini og kalipay nga dili kabayran sa kwarta.

Sa una’ng higayun, giila usab ni Radaza sa iya’ng 50-minutos nga SOCA nga nakadawat og 73 ka pakpak ang mga Oponganon nga nisaksi sa kalihukan.

Kahinumduman nga nikita og P1.4 bilyones sa buhis ang dakbayan niadto’ng 2014 gikan sa P927 milyones niadto’ng 2010.

Gipaambit usab sa mayor nga mas nidaghan na ang mga negosyo sa dakbayan nga nahimong 12,000 gikan sa 7,000 niadtong 2010.

Gipasalamatan ni Radaza ang tanang establesemento sa dakbayan ilabi na niadto’ng nibubo og daku’ng kapital sa dakbayan sama sa SM, Megaworld, Lufthansa Technik ug giapil usab niini ang GMR-Megawide Cebu Airport Corporation ug Philippine Economic Zone Authority (PEZA).   (BANAT NEWS)