Traysikol drayber gipatay

CEBU, Philippines - Gipatay ang usa ka traysikol drayber samtang kini natulog lang didto sa Purok Villa Manga, Barangay Opao, dakbayan sa Mandaue human siya gisaka sa iyang silingan ug gipanunggab sa makadaghang higayon kaniadtong Biyernes sa gabii.

Si SPO2 Juan Calamba sa Presinto 5 sa Mandaue City Police Office (MCPO) miingon nga si Danilo Quiñal, 43, nahiagom og daghang mga dinunggaban human siya giatake ni John Bryan Comendador, 22 anyos.

Si Comendador mitahan ra usab sa iyang kaugalingon ngadto sa kapolisan ug gitugyan ang 13 pulgadas nga kutsilyo nga gigamit niya pagpatay ni Quiñal. 

Matud ni SPO2 Calamba nga si Comendador mipahibalo kanila nga napatay na g’yud niya ang iyang silingan nga kanunay nga manghagis kaniya.

Si Comendador gitanggong karon sa kapolisan. Samtang nakaangkon og samad pinusilan sa iyang liog ang usa ka Job Order worker sa Naga City Hall human siya gipusil sa wala pa mailhi nga lalaki samtang nagdrayb sa iyang motorsiklo didto sa Sitio Tayad-Tayad, Cantao-an, Naga  kaniadtong Biyernes sa hapon.

Si PO3 Ken Cabrera, desk officer sa Naga City Police Station, miingon nga si Edito Sasan mopauli na unta sa ilang balay. Ang biktima dali nga gidala sa South General Hospital ug matud pa ni PO3 Cabrera nga luwas hinuon kini sa makuyaw nga kahimtang.

Wala pa masuta sa kapolisan kun unsa ang motibo sa pagpatay.

Nagpahigayon pa karon ang imbestigador sa maong kaso og follow-up investigation aron mailhan ang mipusil sa biktima.  (BANAT NEWS)