Cyber addiction

CEBU, Philippines – Nagkadaghan karon ang naadik sa internet kon kining gitawag nga cyber addiction niining digital age.

Hinoon, wala pa gikonsiderar sa mga eksperto nga usa na kini ka matang sa sakit ang cyber addiction apan duna nay mga eksperto ang nagtuon labot niini.

Gihulagway sa usa ka Child Psychiatrist nga si Dr. Nancy Cinco, ang rason nga maadik ang usa ka bata sa internet tungod kay dili kini makighugoy-hugoy sa ubang mga bata.

Ang batang makasinati og social anxiety disorder dili na ganahan mosulod sa klase tungod kay mas pilion niini ang mag-inusara.

Laing senyales nga naadik na sa internet ang usa ka tawo kini kun magsige na kini og tan-aw sa mga websites nga nagpasundayag og cybersex, pakigrelasyon diha sa internet, sugal, ug online games.

Sigon ni Dr. Doris Largo, board member sa Philippine Mental Health Association-Cebu, tungod sa pagkagumon na sa tawo sa internet mapasagdan na nila ang ilang mga responsibilidad ug relasyon niini sa komunidad o sa mga nakapalibot niya.

Si Dr. Glenda Barubas, Presidente sa PMHA-Cebu miingon duna silay kampanya alang sa mga tinun-an dinhi sa Sugbo aron dili sila maadik sa internet.

Sumala pa nila, usa sa rason nganong nidaghan ang cyber addicts mao ang kakuwang sa pagpakatap og impormasyon kabahin sa makadaot nga epekto sa cyber addiction ngadto sa mga tinun-an. – /EIM) (BANAT NEWS)