Upat nangahilo sa baraderohan
CEBU, Philippines - Nangahilo ug nagsuka ug nalandig sa tambalanan ang upat ka mamakyaway paglimpyo sa usa ka pribadong baraderohan sa Slipway, Barangay Poblacion dakbayan sa Lapu-Lapu kagahapon sa buntag.
Si Senior Fire Officer 1 Hadji Samonte sa Lapu-Lapu City Fire Department nagkanayon nga padulong unta mosulod sa usa ka barge sila si Wilbert Bongaciso, Wendyl Leonado, Jedmar Nilo ug Jaypee De Castro ug si Ernesto Lambot aron manglimpyo apan nahanggab nila ang alisbo sa "sulfuric acid."
Ang Castor 3 nga barge mao untay limpyohan sa lima. Gikan pa kini sa usa ka minahan naghatud og mga scrap metals. Unang nikanaog sa cargo hold si Bonganciso, misunod dayun si Leonado, Nilo ug si De Castro , apan si Lambot wala na mosunod kanila tungod kay sa paglili niya sa ubos nakabantay kini nga nangahapla ug nagpatongpatong na ang upat.
Nagkanayon si Samonte nga nangahilo ang upat tungod sa nangalisbong kemikal ug wala sila’y mga protective gears sama sa face mask.
Daling gidala sa Vicente Sotto Memorial Medical Center ang upat.
Matud pa ni Samonte, usa ka Boboy Jumao-as maoy gikatahong nikuha kanila aron limpyohan ang barge.
Si Ronald Laida, contractor sa barge sa Concrete Solutions, Inc. miingon nga wala niya sugoa si Jumao-as nga pasudlan ug palimpyohan ang cargo hold.
Midugang si Laida nga moluwat pa sila og opisyal nga pamahayag apan unahon una nila ang pagtabang sa mga biktima. (BANAT NEWS)
- Latest
