Naggamit og nubain nasikop

CEBU, Philippines – Nasikop ang tulo ka lalaki nga naaktohan nga naggamit og nubain sa Upper, barangay Pit-os, dakbayan sa Sugbo pasado ala-una sa nakalabay nga hapon.

Ang mga nasikop naila nga sila si Felix Cogtas, 47, minyo nga taga barangay Binaliw, Mark Anthony Capaning, 39, minyo, taga Consolacion ug Roy Flores, 50, minyo nga taga Poblacion Occidental, Consolacion.

Sumala pa ni Senior Insp. Bienvenido Miral, hepe sa Talamban Police Station, nga usa ka impormasyon ang ilang nadawat may labot sa mga tawo nga naggamit og ilegal nga drugas sa mao’ng dapit.

Dali nga nagpadala og mga polis si Miral sa lugar ug nasakpan ang tulo ka lalaki sulod sa usa ka payag-payag nga nagturok og nubain.

Nakuha sa kapolisan sulod sa payag-payag ang tulo ka syringe nga duna pa’y sulod nga gidudahang nubain ug usa ka buak nga ampoule sa mao’ng drugas.

Gitanggong na sa karsel sa Talamban Police ang tulo ka dinakpan nga pasakaan og tukma’ng kaso. – /GMR) (BANAT NEWS)